Her ýylyň awgust aýynyň ahyrynda mugallymlaryň seminar-maslahatlary geçirilýär. Şol seminarlaryň birinde okuw-sapaklara degişli tabşyryklardan başga-da, pagta ýygymyna gatnaşmaly okuwçy gyzlara berk gözegçilik etmek mugallymlara gizlin tabşyryk hökmünde ýetirildi. Hususan-da bu tabşyryk Ahal welaýatynyň mugallymlaryna aýratyn tabşyryldy. Beýle tabşyryk berilmeginiň özüne ýetesi sebäbi bar. Ahal welaýatynyň Tejen, Altynasyr etraplarynda pagta ýygýan gyzlar analgetik dermanlary köp atýarlar. Ol ýygymçy gyzlaryň atýan käbir analgetik dermanlarynyň düzüminde narkotiki düzümlileri hem bar. Düzüminde neşe serişdesi bolan «tramadol» analgetigine pagta ýygýan ençeme ulugyzlaryň uýgunlaşýandygy maslahatda mugallymlaryň dykgatyna ýetirildi. Tejen etraby Ahal welaýatynda neşekeşlik babatynda iň bir ýokary görkezijili etrap bolup durýar. Etrapda pagtanyň arasyna neşe ekinlerini ekýän daýhanlar az ýüze çykarylmaýar. Häzir ýurtda neşekeşligiň garşysyna berk göreşilýändigine seretmezden, Tejen etrabynda neşekeşler bütinleý ýok bolup gidenok. Olar ýa-ha gizlin ýerlerde ösdürilip ýetişdirilýän tirýegi çekýärler ýa-da tirýek garyndyly dermanlary ulanýarlar. Bu ýagdaýyň pagtaçy gyzlaryň arasyna hem ýaýrandygy mugallymlara gizlin duýduryldy. Neşe serişdeleriniň gadagan edilmegi bilen birlikde neşe garyndyly dermanlary hem apteklerde satmaga çäklendirilmeler girizildi. Bu ýagdaý aňsat ýol bilen baýajaklara ýol açdy. Öňler neşe serişdeli analgetik bolan «tramadolyň» bir paçkasyny 3 manada alan bolsalar, häzir onuň ýekeje dänesiniň bahasy 20 manat. Hökümet hernäçe gadagançylyk girizse-de, neşe garyndyly dermanlar, onuň sanjylýan görnüşleri daşary ýurtlardan beýleki dermanlar bilen gelip durýar. Olar gizlin bilen bazarlarda satylýar. Aşgabadyň 30-njy mikroraýonynyň bazaryndan, teke bazardan, «Mir» bazar» ady bilen belli bolan bazardan derman satýan daýzalardan neşe garyndyly dermanlary tapyp alyp bolýar. Şeýle dermanlary satýan daýzalary olaryň «öz» alyjylary gowy tanaýarlar. Cheshme http://www.chrono-tm.org/tm/archives/264