Худайың нәме талап эдйәндигини нәдип билип болар Мукаддес Язгыларда нәхили ваҗып хабарлар бар? (1) Онуң авторы ким? (2) Мукаддес Язгылары нәме үчин өвренмели? (3) 1. Мукаддес Язгылар — бу, Худайың өрән гымматлы совгадыдыр. Оны, сөйгүден долы атаның өз чагаларына язан хаты билен деңешдирип болар. Мукаддес Язгыларда Худай барада хакыкат айдыляр: ол ким ве онуң кадалары нәхили. Онда, кынчылыклары нәдип еңип боляндыгы ве нәдип хакыкы багты тапып боляндыгы дүшүндирилйәр. Худая нәдип яранмалыдыгыны, диңе Мукаддес Язгылардан билип болар (Зебур 1:1—3; Ишая 48:17, 18). 2. Мукаддес Язгылары, бизиң эрамыздан өң 1513-нҗи йылдан башлап, 1600 йылың довамында такмынан 40-а голай дүрли адамлар яздылар. Мукаддес Язгылар 66 саны китапдан ыбарат. Оны язан адамлары Худай рухландырды. Олар өз пикирлерини дәл-де, Худайың пикирлерини яздылар. Шол себәпли Мукаддес Язгыларың Авторы — адам дәл-де, гөклерде яшаян Худай (2 Тимотеос 3:16, 17; 2 Петрус 1:20, 21). 3. Худай, Мукаддес Язгыларың догры гөчүрилмегиниң ве абат сакланылмагының аладасыны этди. Мукаддес Язгыларың чап эдилен саны башга хер бир китабың тиражындан хас көпдүр. Сениң Мукаддес Язгылары өвренйәндигиңе хеммелер бегенмез, эмма хич киме окувыңа бөвет болмага ёл берме. Гаршылыга гараман, Худай барада билим алмак ве онуң ислегини берҗай этмек — бу сениң эбеди гелеҗегиң гиревидир (Матта 5:10—12; Яхя 17:3).