Stalinçilik ýyllaryndaky kollektiwleýin jezalandyrma düzgüni Türkmenistanda henize-bu güne çenli hem ulanylýar. Meşhur aktýor Hoja Ýegendurdyýew aýal doganynyň jenaýatda tutulandygy üçin işden çetleşdirildi. Hoja Ýegendurdyýew “Ýaşlyk” telekanalynyň “Degişmeler dünýäsi” atly hepdelik telewizion programmasyny alyp barmak bilen, il arasynda uly meşhurlyk gazanypdy. Onuň öz kärdeşleri bilen 2005-nji ýyldan bäri taýýarlaýan degişmeleri, ýomaklary halka hezil berýärdi. Emma 9-njy sentýabrda teleprogrammada yglan edilen gepleşigiň efire çykmazlygy we bu barada hiç zat aýdylmazlygy tomaşaçylary aňk-taňk etdi, emma olar muňa känbir ähmiýet bermediler. Ýöne “Degişmeler dünýäsiniň” soňky hepdelerde hem efire çykmazlygy il arasynda dürli müş-myşlaryň ýaýramagyna getirdi. Biri ol tarpa-taýyn ölüpdir diýse, ýene birleri ol däliräpdir diýýärdi. Bu myş-myşlar adamlary häzirem ynjalykdan gaçyrýar. Sebäbi Hojanyň il içindäki meşhurlygy prezidentiňkiden ýokary bolmasa, pes diýip boljak däl. H.Ýegendurdyýewiň işden çetleşdirilmegine onuň aýal doganynyň awgust aýynda, serhetden neşe maddalaryny geçirmäge synananda saklanmagy sebäp bolupdyr. Aktýoruň aýal doganyna garşy jenaýat işi açylypdyr. Şu sebäpden hem, türkmen hökümetiniň telewideniýä gözegçilik edýän wise-premýeri Bägül Nurmyradowanyň “Ýaşlyk” telekanalynyň başlygy Begenç Abaýebe elin tabşyrmagy netijesinde, tanymal aktýor telewizoryň ekranyna çykarylmasyz edilipdir. Ýöne H.Ýegendurdyýew S.Türkmenbaşy adyndaky baş döwlet drama teatrynda aktýor bolup işlemegini dowam etdirýär. *** Hoja Ýegendurdyýew 1969-njy ýylda Balkan welaýatynyň Etrek obasynda dünýä inýär, 1994-nji ýylda Moskwada Şepkin adyndaky Ýokary teatr uçilişesini tamamlap, şondan bäri Türkmenistanda aktýor bolup işleýär. çeşme