Gadym zamanlarda bir daýhan adam bar eken. Daýhan her gün agşam öz ýanyndan göwün ýüwürdip, bolsady ekip ýatar eken. Bir gün şol bolsadylaryny ekip ýatypdyr weli, düýş görüpdir. Düýşünde ol garyp daýhan bir ýere barýar eken. Ýolda onuñ öňünden bir owadan ak guş çykypdyr. Ol guş göräýmäge şeýle owadan, sypaýy guş bolsa-da, ol haram maslyga gonup, ony çokalap otyr eken. Ol garyp munuň bolşuny geň görüp, geçip gidiberipdir. Gidip barýarka, birgiden gülli ýorunjanyň içinde-de bir ýaby daňylgy dur weli, şeýle bir hor eken. iteleseň ýykyljak bolup dur eken. Ol daýhan muny hem geň görüp geçiberýär. Gidip barýarka bir çöl beýewanyň içinden geçýär. Töwerekde diş synçgar ýalam ot-çöp ýok eken. Emma şol takyrlygyň içinde bir at daňylgy dur weli, şeýle bir semiz eken, edil lowurdap duran endamyndan ýag damaýjak bolýarmyş. Daýhan muny hem geň görüp, geçip gidiberjek bolanda oýananmyş. Garyp daýhan gören düýşüni bir hiliräk görüp, garry atasyna gürrüň berenmiş. Garry atasy hem oglunyň gürrüňini diňläp: - Ol gören zatlaryň hemmesi hakykatdyr, oglum – diýipdir. Ol seniň öňüňden ilki çykan ak guşuň-a şu zamanyň daşy jäjek, içi möjek käbir harsydünýä adamydyr.Onuň yzyndan gülli ýorunjanyň içinde itseň ýykyljak bolup duran ýaby hem şu zamanyň käbir husyt adamlarydyr. Olar hem edil şol seniň gören ýabyň ýaly zady dünýä sygýan däldir weli, özi iýip-içip bilmän, ýumrugyndan çyksa ýalap, çykmasa oňup ýörendir. Takyr ýerde daňylgy, endamyndan ýag damaýyn diýip duran ýabyň bolsa biz ýaly özi garyp bolsa-da, dokmäde adamlardyr. Garyp atasy bilen ylalaşman: - Ol nähili biz ýalymyş? Semizliginden ýaňa endamyndan ýag damaýyn diýip dur. Emma biziň bolsa iýere nanymyz ýok, geýere donumyz ýok, owurdumyz-owurdumyzdan geçeýin diýýär. Onsoň biziň endamymyzdan ýag damarmy? diýen. Onda atasy: - Ýok, beýle däl, oglum. Şol takyr ýerde daňylgy semiz ýaby dokmäde garyp adamlardyr. Garybyň puly, dony bolmasa-da, göwni giňdir, ruhy beýikdir. Bir zat tapsa-da çagalary bilen, il-güni bilen paýlaşyp iýer. Gününi gaýgysyz-gamsyz, keýpi kök, wagtyny hoş geçirer. Halal işlär, halal iýer. Iýeni endamyna siňer. Ana, onsoň takyr ýerde daňylan semiz at hem aç-açan şoldur diýipdir.

Köneler, Adgjmptw tarapyndan 12 years ago
Teswir ýazmak üçin Içeri gir