Bagtyýarlyk döwründe ajy habar bolmaly däl!Şu ýylyň 2-nji oktýabryndan 3-nji oktýabryna geçilýän gijede meşhur türkmen diktory Ogulbagt Çaryýewa insult bolup, aradan çykdy. Ömrüni diktor bolup geçiren bu zenan türkmenistanlylaryň arasynda heniz dirikä meşhurlygy gazanmagy başardy. 2009-njy ýylda bolsa oňa Türkmenistanyň halk artisti diýlen hormatly at dakylypdy. Döwlet tarapyndan şeýle derejä mynasyp bolsa-da, tutuş türkmen halkynyň arasynda dirikä uly meşhurlyga eýe bolan-da bolsa, Ogulbagt Çaryýewanyň aradan çykanlygy barada resmi hiç hili maglumat berilmedi. Hatda ol hakda gazetleriň iň soňky sahypasynda kiçijik nekrolog hem çap edilmedi. Meşhur diktoryň ýogalanyny adamlar diňe biri-birinden esli gün geçensoň bilip galdylar. Türkmenistanlylaryň arasynda ol zenanyň dünýeden gaýdanyny entek bilmeýänler gaty kändir. Bu meşhur zenanyň ýogalanyny ýa ýogalmandygyny asla bilmejekleriň juda köp boljakdygy hem anyk. Sebäbi türkmen resmileri özleriniň yglan eden Bagtyýarlyk döwründe diňe şatlyk-şagalaňyň bolmalydygyny öňe sürýärler. Ajy habar bagtyýar Türkmenistanda bolmaly däl diýen ideologiýany öňe sürýärler. Şu sebäpden hem ýurduň metbugatynda nekrolog çap etmek asla gadagan edildi. Tanymal, meşhur adamlar dünýeden gaýdyp, diňe birki ýyl geçensoň, olar hakda ýatlama çap etmäge rugsat edilýär. Türkmen resmileriniň tanymal şahsyýetleriň aradan çykanlygy barada köpçülikleýin habar beriş serişdelerinde gynanç berilmegine gadagan girizmegi sebäpli, adamlar özleriniň hotmat-sylag bildirýän şahsyýetleriniň dünýeden gaýdandygyny ep-esli wagt geçenden soň bilip galýarlar. Türkmen resmileriniň bu hereketi käbir ýagdaýlarda meşhur şahsyýetleriň ölümi bilen bagly habarlaryň ne ýalandygyna, ne-de çyndygyna takyk ynanmak meselesine hem güman döretdirýär. Häzirki wagtda meşhur komiki artist Hoja Ýegendurdyýew bilen bagly ilat arasyndaky dürli myş-myşlaryň ýüze çykmagy-da resmileriň hut şu hereketleri sebäplidir. Soňky üç-dört ýyllykda aradan çykan meşhur şahsyýetler bolan Atabaý Çarygulyýew, Nurmuhammet Meredow, Ödenyýaz Nobatow, Sapargeldi Annasähedow, Hudaýberdi Durdyýew, Annaberdi Agabaýew, Näzik Annatyýewa, Ata Alowow, Ýagşymyrat Akyýew we başga-da birnäçe görnükli adamlar barada türkmen habar beriş serişdeleri dymdy. Özi hem bu dymyşlyk aradan çykan şahsyýetleriň syýasy ýa başga bir bolgusyz zada bahalanmagy bilen däl-de, hut ýurduň ýöredýän şatlyk-şagalaňly ideologiýasy sebäplidir. Türkmen resmileriniň öňe sürýän ideologiýasyna laýyklykda, elmydama toý-baýrama beslenýän şatlyk-şagalaňly Türkmenistan döwletinde hemişe gülki bolmaly, toý bolmaly, ýöne ajy habar welin hiç wagt bolmaly däl!