Salam hormatly agzalar we gadyrly myhmanlar! Ýaňy goňşy mowzukda:
"...başga bir guramaň gürrüňi gidýän ýaly. Olam "Höwesjeňler guramasy we agzalary" bolmaly öýdýän. Bu babatda aýry mowzukda pikir alyşyp bileris. Häzir men täze mowzuk açjak dost sahypadan Agajan agaň goýan ýazgylaryny ulanyp. Eseriň eýesi bolsa, Ylýas Amangeldi aga. Eseriň Türkçe görnüşiniň ady "Kalir dudaklarda şarkimiz bizim" bolmaly. Türkmençe görnüşini bilemok, ýöne türkçesi elimde bar şu wagt. "diýipdim, ynha-da, görşüňiz ýaly netijesi. Başda "eseriň Türkmençe görnüşini bilemok" diýipdim, ýöne şu wagt öwrendim: eseriň ady «Günüň dogmasy aňsatmy?» Indi şol eserde käbir bölekleri aşakda bölek-bölek goýmakçy. Soňam TTM (Türkmen-Türk Mekdepleri) barada özara pikir alyşyp bileris! Sag boluň!
ata 15 years ago- «Günüň dogmasy aňsatmy?» diýen kitapdan bölek.
SSSR dargap dörän garaşsyz ýurtlaryň arasynda uruş-gygyryş görmän ýaşap gelýän Türkmenistan ilkinji ädimleriniň parahatçylykly bolandygynyň gymmatyna ýyl geçdigiçe çuň düşünip başlady. Beýik Serdarymyz iliniň uly hem ilkinji söýgüsini ýurtda parahatçylygy sakalamagy başaryp gazanypdy. Içi ýat ýurtlarda, nahak gülleden wepat bolan, gül ýüzli türkmen ýigitli demir tabytlaryň gelip durmagynyň öňüni alany üçin halk ilkinji Prezidentini başyna täç etmäge taýýardy. Bu Beýik ogluň ýurdunda harby bölümlerini, uruş ojaklaryny däl-de, bilim ojaklaryny açmagyny türkmen ili uly begenç bilen kabul edipdi.
Emma mekdep açmak meselesine hemmeler Serdary¬myz ýaly batyrgaý hem öňdengörüjilik bilen garap bilmändi. Ine şeýle garaýyşlar Türkmenistana Türkiýeden mekdep açmaga ilkinjileriň hatarynda gelen Hajy Ýusuf Kemal Erimeziň gözüne ýaş aýlandyrypdy. Bu wakany Türkmenistanda mekdep açmak üçin Hajy Ýusuf Kemal aga bilen gapy-gapy aýlanan Sadetdin Başer şeýle gürrüň berdi. Türkmenistanda türkmen-türk mekdepleriniň açylmagynyň gözbaşynda duranlardan biri Sadetdin aga ilkinji ädimleriň janly şaýady, tapylgysyz hazynady.
„Şol döwürlerde Türkmenistanyň Bilim ministrliginde jogapkär wezipeleriň birinde oturan wezipeli adam Türkýäniň gyzyl baýdagyny mysal alyp bize: „Bir gyzyl baýdakdan ýaňy dyndyk, ikinji gyzyl baýdak bize gerek däl“ diýipdi. Kemal aga başyna täç edip gezýän Watanynyň baýdagynyň bir ýykylan döwletiň baýdagyna deňelmegine namys edipdi. Namysdan ýaňa köpi gören gözlerinden syrygan ýaş gasyn-gasyn ýaňaklaryndan akyp gysgajyk ak sakalyna siňip gitdi. Çünki ol garşysyndaky adama ortasy aý-ýyldyzly baýdagynyň şol diýilýän gyzyl baýdakdan tapawudyny düşündirerden ejizdi. Oňa düşünilmegi üçin wagt gerekdi. Türkmenler „Tanamadyk sylamaz“ diýýärler. Biziň baýdagymyz hem sylaga-hormata mynasyp bolmak üçin özüni tanatmalydy.