Salam hormatly dostlar we doganlar! Adyndan belli bolşy ýaly Hoja Nasreddini (Ependi) tanamaýan ýok bolsa gerek. Bu şahsyýet barada halklaryñ arasynda giñden ulanylyp gelinýän rowaýatlar, şorta sözler uly meşhurlyga eýe bolup durýar. Men gowsy gepi uzaldyp oturman esasy mowzuga başlaýyn. Bilimli, akylly adamlaryñ hemmesiniñ bolşy ýaly, Hoja Nasreddin hem çagalar bilen yzygiderli meşgullanypdyr. Akşäherli çagalar onuñ töweregine toplanyp, hojanyñ gyzykly gürrüñlerini, degişmelerini diñläpdirler, gülüp- oýnapdyrlar. Sähel bir kynçylyk ýüze çyksa-da, körpeler hojanyñ ýanyna ylgar ekenler. Bir gezek çagalar hoz toplapdyrlar. Ýöne paýlaşanlarynda jedel ýüze çykýar. Olar hojanyñ ýanyna gelip: "Bize hozlary deñ paýlap ber" diýipdirler. Hoja: "Siz paýlaşygy Allanyñky ýa adamlaryñky ýaly edip bölmegimi isleýärsiñizmi?" diýip sorapdyr. Ruhy ter-tämiz çagalar: "Elbetde, Allanyñ paý edişine görä" diýipdirler. Hoja hozlary bölüp başlapdyr: birine bir goşawuç, başgasyna bir gysym, ýene birine birnäçe, beýlekisine ýekeje hoz beripdir. Hoz ýetmän galanlaram bolupdyr. Beýle geñ bölüşige çagalar düşünmän haýran galypdyrlar. Olar: "Hoja, bu nähili beýle bolýar?" diýipdirler. Hoja şeýle jogap beripdir: "Galmagal etmäñ, geliñ düşünşeliñ. Ine, Berieddiniñ baý kakasy bar, şäherimizde hormatlanýan adam. Köp çagaly maşgalasy bar, hemmesem, tüweleme, biri beýlekisinden gowy. Bujagaz Sinaneddiniñ kakasy bolsa ýarlykly garyp, özi maýyp, işläp bilenok, aýalam pukara maşgaladan, çagalary bolsa iýmek-içmek isleýär. Husameddiniñ ýagdaýy bütinleý başgaça. Görşüñiz ýaly, her kimiñ ýagdaýy bir başga. Meniñ öz ýagdaýym-a hiç kimiñkä-de meñzänok. Ine, çagalar, şuña Allanyñ paý edişi diýilýär. Allanyñ keramatynyñ hem merhemediniñ çägi ýokdur. Ol adamlara akyl beripdir, haýyr bilen şeri görkezipdir, peýda bilen zyýany düşündiripdir. Allanyñ eçilenlerinden: akyldan, bilimden, tejribeden, duýgudan hem kuwwatyndan ýerlikli peýdalananlar Ýaradanyñ nesip etdiren näzi-nygmatlaryna eýe bolýarlar, dogry ýoly tapmaýanlar bolsa, garamaýak pukaradyrlar. Hut şonuñ üçin deñ paýlanyşyk bolmaýar. Onsoñam bu zatlary Allanyñ özi dogry biler". Indi mowzugy okan bolsak Hoja Nasreddiniñ çagalara beren düşündirişi sada dil bilen aýdanymyzda gysgaça nähili mana eýe bolup durýar. Eger mümkin bolsa siz hem bu baradaky öz pikirleriñizi beýan edäýseñiz minnetdar bolardym, şeýle hem mowzukda has aýdyñlaşma pikirleri ýüze çykardy.