Salam hormatly agzalar. Men bu mowzugymda türkmen halky tarapyndan az wagtyñ dowamynda uly meşhurlyga, öçmejek söýgä mynasyp bolan şahyrymyz Gurbannazar Ezizow barada gysgaça maglumatlary siziñ bilen paýlaşmakçy. Öñ bilýänem bolsañyz zyýan etmezmikä diýýän. Gurbannazar Ezizow (1940-1977) Geçen asyryň ikinji ýarymynda özboluşly talanty bilen gysga ömründe türkmen edebiýatynda öçmejek yz galdyrmagy başaran şahyr Gurbannazar Ezizow Aşgabat etrabynyň Büzmeýin obasynda 1940-njy ýylda eneden bolýar. Ol 29-njy orta mekdebi tamamlap, Türkmen Döwlet uniwersitetine okuwa girýär. Gurbannazar on bäş ýaşyndaka, onuň ilkinji goşgulary çap edilip başlanýar. Döredijilige ýaşlykdan bütin durky bilen berlen G. Ezizow uniwersiteti tamamlansoň, çagalar neşirýatynda, soňra “Edebiýat we sungat” gazetinde, Türkmenistanyň ýazyjylar birleşiginde işledi. Ol iň köp okaýan şahyrlardandy. Mydama gözlegdedi. G. Ezizowyň döredijiligine täzeçillik, az sözlülik, çuň many-mazmunlylyk, özboluşlylyk , kapyýa (içki sazlaşyk, bogun sazlaşygy, äheň sazlaşygy) mahsusdyr. Ol redif, refren, omonik rifmalar, setiriň başyny ritmalaşdyrmak, içki ritmi güýçlendirmäge köp üns berdi. Türkmen edebiýatyny täze forma we mazmun bilen baýlaşdyrdy . G.Ezizow ýüzlerçe täzeçil, gowy goşgular bilen birlikde türkmen edebiýatynda ilkinji bolup “Sönetler çemenini” döretdi. “Daş gyz”, “Pikir derýasynda akyl gämisi”, “Söýgi”, “Güýz” poemalaryny, “Nesiller”, “Uruşdan soň”, “Tabyt” dramalaryny, “Görogly” şadessanynyň librettosyny ýazdy. Türkmen sährasy Bahar meýlisinde çyksaň seýrana, Türkmen sährasynyň aldyr gülleri. Başyň sypap seni goýar haýrana, Belent daglaryndan öwsen ýelleri. Gara bulut gelip, zemine çöker, Al-asman gübürdäp, depregin kakar. Daglardan sil akar, ýene gün çykar, Gyz-gelin doldurar reýhan çölleri. Ýagyşy ýaraşar ýaýlaň ýazyna, Gerçekler bendidir aşyk gyzyna. Sesin goşup dutar, gyjak sazyna, Saýrar illerimiň şirin dilleri. Serpaý Söýüň meni – ýürek söýgi küýseýär, Şeýle bir küýseýär – ýok çaky-çeni. Ýekeje adama ýeterlik söýgi Bilen bir pursatlyk söýüň siz meni. Maňa kän zat, Uly bir zat gerek däl, Eliňizi ýüregňize goýuň siz: Size söýgi bilen ýüzlenýän günlem Sözlerimi kesä çekmän söýüň siz. Söýüň meni – ähli erki hem durky Bilen size tarap ýollar çekeni. Ýeke özüň söýüp ýörseň elmydam Birazajyk agyr düşjek ekeni. Söýüň meni – siziň sadyk guluňyz, Soňra menden size galar şeýle paý. Men size bahasyz serpaý ederin – Şalaryň elinden gelmejek serpaý.