Adamlar barha azgyn bolarlar,
Ýakyna gelende ahyrzamana.
Şeraba,humara maýyl bolarlar,
Ýakyna gelende ahyrzamana.

Atadan eneden perzendi bizar,
Söwdegär aýaldan doludyr bazar,
Loluhana döner akar suw boýlar,
Ýakyna gelende ahyrzamana.

Aýallar erkekleriň lybasyn geýer,
Äjit-Mäjit adam etini iýer,
Adamlar Hudaýa däl,deçjala uýar,
Ýakyna gelende ahyrzamana.

Jahyllar okamaz,gaçar ylymdan,
Ýüz sowmaz arakdan,nasdan,çilimden,
Dünýäň ýüzi dolar nähak ölimden,
Ýakyna gelende ahyrzamana.

Mollalar Gurhany okamaz,çaklar,
Tabyt götermezler,ulaga ýüklär,
Ölenler janly deý suratda geplär,
Ýakyna gelende ahyrzamana.

Ekinde boý galmaz,şemalda hazan,
Toý-tomaşa,ýas-da ýuwulmaz gazan,
Minara çykylyp okalmaz azan,
Ýakyna gelende ahyrzamana.

Baýtalda syrt galmaz,sygyrda göwis,
Çöllerde gurt galmaz,meýdanda tawus,
Erkekde erk galmaz,heleýde nebis,
Ýakyna gelende ahyrzamana.

Gaflatda geçer ömriň köpisi,
Gymmat bolar ajy zatlaryň bahasy,
Oýanyň,ýapylar toba gapysy,
Ýakyna gelende ahyrzamana.

✏???