1931-nji ýylyñ 7-nji maýynda köp şowhunlaryñ şaýady bolan garry şäher - Nýu-Ýork şindize çenli görmedik, polisiýa tarapyndan gurlan gabawyñ örän pajygaly tamamlanyşyny gördi. Birnäçe hepdäniñ dowamynda yzarlap, ahyrsoñy Krouli "Iki Pistoletliniñ" Uest-End- awende söýgülisiniñ jaýyndadygyny bilip, daşyny gabanlaryndan soñ, ol çykgynsyz ýagdaýda galdy. Ýüz elli polisiýa işgärleridir añtaýjylary onuñ ýokarky etaždaky gaçybatalgasynyñ daşyny gurşap aldylar. Olar "polisiýa gyrgynçysynyñ" gizlenen jaýynyñ üçegini deşip, içerik gözýaşardyjy gaz goýbermekçi boldular. Soñra olar goñşy jaýlarda pulemýotlary gurdular. Bir sagatdanam gowrak wagtlap Nýu-Ýorkuñ iñ owadan kwartallarynyñ birinde pistoletiñ towhuldysydyr pulemýotyñ tatyrdysy ýatmady. Mähnet kreslonyñ añyrsynda gizlenen Krouli yzyny üzmän poliseýleri oka tutýardy. On müñ tomaşaçy bolsa bu söweşe howsala bilen syn edýärdi. Henize çenli Nýu-Ýorkuñ köçelerinde beýle hadysa bolmandy. Kroulini tutanlarynda, polisiýanyñ naçalnigi Malruni: "Bu kellekeser Nýu-Ýorkuñ taryhynda bolan iñ howply jenaýatkärleriñ biridir. Ol sebäpsiz ýere adam öldürmäni hiç zatça görenok" diýdi. Krouli "Iki Pistoletiniñ" özi-özüne nähili baha berýärkä? Biz ony bilýäris, sebäbi polisiýa onuñ gizlenen ýerini oka tutup durka, ol degişli adamlarynyñ birine hat ýazan eken. Hat ýazyp otyrka onuñ ýaralaryndan akan gan kagyzyñ ýüzünde gyrmyzy tegmiller galdyryp gidipdir. Krouliniñ hatynda şeýle jümleler bar: "Meniñ gursagymda heniz hiç kime ýamanlyk etmedik, ýadaw, ýöne mähirli ýürek urýar". Mundan birnäçe gün ozal, Long-Aýlende barýan ýoluñ gyrasynda Krouly söýgülisi bilen maşynyñ içinde gujaklaşyp oturan eken. Birden maşynyñ ýanynda polisiýa peýda bolupdyr-da: "Sürüjilik hukuknamañyzy görkeziñ" diýipdir. Krouli sesini-üýnüni çykarman, pistoletini alaga- da, polisiýa garşy ok ýagdyrypdyr. Jany çykyp barýan poliseý ýykylandan soñ, Krouly maşyndan çykypdyr-da ýañkynyñ sapançasyny gabyndan alyp, ýazylyp ýatan göwräni öz ýaragy bilenem bir gezek atypdyr. Ynha, şu - "Meniñ gursagymda heniz hiç kime ýamanlyk etmedik, ýadaw, ýöne mähirli ýürek urýar" diýip ýazan ganhoruñ edýän işi-dä! Kroulä elektrik oturgyjyñ üstünde jeza bermek höküm edildi. Haçanda ony Sing-Sing türmesindäki ölüm jezasy berlenleriñ bölümine getirenlerinde: "Maña adam öldürenim üçin jeza berlendir öýdýäñizmi? Ýok, maña özümi goranym üçin jeza berdiler" diýipdir. Bu ýerde esasy aýtmakçy bolýan zadym, Krouli "Iki Pistoletiniñ" şu ýagdaýda- da özüni günäkärlemeýänligidir. Eger şu nukdaý nazar jenaýatçylar üçin tötänlikdir öýdýän bolsañyz, yzyna gulak asyñ.