Gaýtalanma (Kakamyrat Rejebow)
Hiç ýadymdan çykanok...
Oglanjykdym ýaňy ýedi ýaşlyja.
Uzyn gije ýat tutup bir goşgujyk.
Gitdim men Täze ýyl dabarasyna,
Säher bile...
Deň-duşlarma goşulşyp.

Köplük başym aýladymy, bilmedim,
Nobat maňa ýeteninde, niçikmi,
Setir-setir pikir-oýum, garasaý,
Garasar deý bir ýerlere uçupmy-
Dile ýeke setir gelmese nätjek-
Nirde siz, ýat tutan sözjagazlarym?!
Durun men tegeläp gözjagazlarym...

Aýazbaba sowgadyny uzadyp,
Bolşuma birgeňsi ýylgyrdy şonda...
Utanmak utandym, iňňän,
Ah, meniň çaga göwnüm.
Ah, meniň sada dünýäm.

Ýeri, indi ulalypmyşam-da...
Barybir bolmasa bolmajak eken.

Ynha, bu gůn seniň ýanyňa barýan,
Dessanlary okap çeperden-çeper...
Ýat tutup yşk sözün şirinden-şeker...

Halas borun azap beren oýlardan,
Saňa sözüm aýdyp bilsem sag-aman...
...Ýene-de bolmady.
...Duşuşygymyz
meňzedi şo-ol Täze ýylky dabara...
Ýene-de oňarmadyk...
Ah, men ulalyp oňalmadyk...

Goşga däl,
bir söze ýetmedi erkim,
Köplük däl, ikiçäk bolsagam hatda...
Iň zerur ýerinde zerur sözleri
unutdym...
Özümi ýitirdim asla.
Özüm kämil çykan aşyk saýsamam.

Bilmedim...
Şo-ol düşbi Aýazbaba deý,
Senem bu bolşuma täsin ýylgyryp,
Yşkyň sowgat edip uzadaýmasaň...

Kakamyrat Rejebow
28.07.2021 14:08