Hemmäňe ýüzlenip içimi dökýän,
Bir nurana kakamyzam bolmady.
Ojak ody öçse täzeden ýakýan-
Aladaçyl kakamyzam bolmady.

Işe gidip maşgalany ekleýän,
Daşa gitse bize sowgat getirýän,
Kyn ýagdaýda işimizi bitirýän-
Jogapkärli kakamyzam bolmady. 

Uly kiçilere görelde bolýan,
Agy hem garany saýgaryp bilýän,
Eger toýa gitse içmäni gelýän-
Gözleri dok kakamyzam bolmady.

Bar kakamyz duşmanlary güldirýän,
Ejem janyň güler ýüzün soldyrýan,
Şeýtanyň ýoluna özün aldyrýan,
Towa edýän kakamyzam bolmady. 

Şeýle alsaň erbedem däl häsiýeti,
Çaý başynda berýär ençe wesýeti,
Içmen diýer içen günüň ertesi,
Sözün haklan kakamyzam bolmady.

Ajy şerap däldir saňa saýawan,
Köpräk içseň pikirleňi zaýalar,
Şoň derdinden ençe adam nalaýar,
Düşünjeli kakamyzam bolmady...

Awtoryñ kimligi paýlaşana näbelli. Egerde awtoryñ kimligini bilseñiz kommentariýada ýazyp bilersiñiz