....Adamlar işe barýardy. Olaryň arasynda penjeginiň boş ýeňi jübüsine salnan bir ýaş ýigidem bardy.Onuň döşinde üç hatar orden plankasy görünýärdi. Ynha, ol ädimini haýallatdy. Bir zatlar ýadyna düşen ýaly, öň ýanynda gadam urýan az-kem hökürräk, uzyn boýly ýigide ýitireni bar ýaly ýiti-ýiti seretdi. Şol barmana-da howlukdy. Çünki uzyn pyýad her ýerden bir ätmeläp, alňasaşyp haýdýan adamlaryň duşyndn geçip barýardy. Onuň her ädimi hadaň agzy ýalydy. “Şol... Gör, bi deýýusyň müýnsiz eňip barşyny...” Ol loňkyldap bardy-da, uzynyň ezeneginden ýapyşdy. -Dur, deýýus!.. -Bi näme boldygy?-Uzyn ýeser emel etdi-de, onyň penjesinden sypdy. Ýüzüniň ugruna gidibermedi-de, golagyň depesinden seredip, birhili haýran galmak bilen gülümsiredi. -Men seni, köpeý ogly, derrew tanadym. Nemes kitelini geýýädiň, bilýäňmi?... “Zig haýl” diýip, kikirdegiňi gyraýjak bolýardyň...-diýip, golak gitdikçe gyzýardy. Onyň sesine adamlar üýşip ugrady. Uzyn pyýada sarsman duruşyna düşindirmäge başlady. -siz meni birine meňzedýäňiz... -Ýok beýdip syparyn öýtmegin, Bu ýeri saňa Lukkenwald däldir-diýdi-de, golak oňa täzden ýapyşdy.-düş öňe, o ýerde baý, bahym bilerler-ä seň kimdigiňi... -Men ýene bir gezek aýdýaryn, siz ýalňyşýaňyz ýoldaş. Uzyn pyýadanyň arkaýynlygy töwerekdäkilere täsir etdi. Olar oňa duýgudaşlyk bildirip ugradylar. -Adamlarda utanç haýa galmandyraý-diýip, bir aýal hüňňürdedi. - Ýene-de frontçydyrynam diýýär-ä... -Daň bilen urandyr-da... Edil şol wagt politse ýetişdide, dawalaşýanlaryň arasyna düşdi. Emma golak köşeşerli däldi. -Kim serhoş menmi?-diýip, ol gaýta bat aldy.-Bilýäňizmi, siz kimiň arkasyny alýaňyz. Wah, bu deýýusyň kimdigini bir bilsediňiz...