Wasp etmäge mejbur etdi dillerim, Derdime derman bolup, ýaran näzleriň. Ýigit baryn perwaz edip ugruňda, Messan basyp, assa ýörän uzlaryň. Saçlaryň owsunlar, ylla mar ýaly, Sende üýtgeşik jady bar ýaly. Alkymyň misli akja gar ýaly, Mährine bendi eden, şirin sözleriň. Her göremde haýran, nurly keşbiňe, Nädip ýaratdy zemin, ajap keşp diňe. Meni bendi eden, çeken keşdime, Kirpigi ok, ol garaja gözleriň. Bagda bilbil bolsaň, menem bagbanyň, Görküne görk goşar, gözel çarbagyň. Güller gurşap alsa, dolap çarýanyň, Bahary bahar eder, seniň ýazlaryň. Aklym haýrandyr nurly jemala, Saçlaryň tolkunar ygyp şemala. Gül bilen bäsleşýän ýaly hamala, Bark urar anbar ysy, ýörän yzlaryň. Gara gözleň jan almanyň kastyna, Durabilmen ol bakyşlaň astyna. Aýdymlarym diňe seniň waspyňa, Bagyş edeýin iň ajabyn sazlaryň. Bir-birinden görmegeý serwi gözeller, Ýene näçe ýazsaňam azdyr gazallar. Deňäp bolmaz size altyn-gyzyllar, Yegen waspyn eder, gözel gyzlaryň.