Kerim şahyr ömrüniň ahyrky günlerinde agyr kesel mahaly bir gezek ahmyr bilen şeýle diýipdi: “Öňde bir şahyryň aýdyşy ýaly: “başardygymça-ha ýazasym gelenok, isledigimçe-de ýazyp bilemok”. Kerim şahyr, megerem, beýik Magtymgulydan soň türkmen okyjysynyň kalbyna iň berk ornaşan şahyrdyr. Onuň onlap, ýüzläp goşgularyny, tutuş epiki poemalaryny ýatdan bilýän okyjylary bar. Şahyryň kitaplary çap edilen badyna okyjylaryň kitap tekjelerine siňip gidýär. Onyň pikir atyş stili, şunlykda tüýs türkmen şahyry bolup aýdyşy käte Magtymgula, Keminä, kätelerem Mollanepese, Mätäjä çalym edýän ýalydyr. Emma ol Kerim şahyr bolup aýdýandyr. Bir gezek uniwersitetde ekzamen berýärkä Kerim şahyryň biledine G.Seýtliýewiň uruş döwri ýazan “Pagonly gyz” goşgusy düşüpdir. Geň galmaly ýeri şahyr ol goşgyny okaman eken. “Okamadym” diýse-hä gülki döretjek. “Okadym” diýse-de ýalançy boljak. Kerim şahyr nädendir öýdýäňiz?! Bilet çekip oturan ýerinde “Pagonly gyz” diýen goşgyny özi ýazypdyr-da güzledip okap beripdir. Ekzamenatorlar biri- birleriniň ýüzlerine çiňňerilişipdirler. Ahyr hem olaň biri: - Ýoldaş, Gurbannepesow, biziň okan “Pagonly gyzmyzda-ha” beýle bentler ýok ýalydy – diýip ynamsyz gürläpdir - Maňa-ha bu goşgyny şahyryň özi okap beripdi, şol wagtyň özünde-de ýat tutypdym. Soň kem-käs üýtgeden bolsa bilemok. Şahyr ekzamenden bäşlik bilen geçipdir. Şahyryň kalby hemişe şygyr bilen dolup durdy. 1975-nji ýylyň mart aýynyň başydy. Giç öýlänler Kerim şahyr redaksiýa geldi. Egni tämiz ak kostýumly- jalbarly, ak köwüşli, ýüz-gözi joşgunly. Gele gelmäne: - “Ýaşkomçy” gelin- gyzlary hemmeden öňürti bahar baýramy bilen gutlap geçeýin diýip sowulaýdym – diýdi. Şahyryň öýi redaksiýadan sähelräk ilerräkde-di. Şahyr geçende-ötende, häli- şindi redaksiýa sowulyp, çaý içip, ýaş kärdeşleri bilen degişip-gülüşip giderdi. Bu gezek hem hemişekimiz ýaly şahyry gadyrly garşyladyk. Stoluň üstünde gazetiň birinji sahypasynda goly komsomol biletli owadan gyzyň suraty durdy. Tegelek ýüzli, ýogyn saçly, buýsanç bilen uzaklara seredip duran gyz diýseň gözeldi. - Şahyr, siz uly toýuň üstünden geldiňiz, toýa bolsa sowgatsyz gelinmeýär. Ynha şu gyza goşgy goşup ber, gazetimiziň ertirki sanynda çap etjek. Şol goşgam siziň ýaşlara sowgadyňyz bolar – diýdim. Şahyr gyzyň suratyna haýran galyp seretdi-de biziň ýüzümize soragly nazaryny aýlady. - Redaksiýada işleýänleriň deň ýarysy ýaş şahyr, şunyň ýaly ajaýyp gyzyň keşbini görübem joşup bilmediňizmi?! - Herimiz bir bent ýazdygam weli, göwnümizden turanok. - Weý-weý, heýde munuň ýaly owadan gyza-da göwnüňden turmaýan goşgy goşup bolarmy?! Hany äber galam kagyzyňy! Kerim şahyr ýüzugra birnäçe setir ýazdy-da maňa uzatdy. - Me ýoldaş redaktor, saňa sowgat. Men şahyryň beren degişme goşgusyny okap gutarmakam, ol ikinjini öňüme süýşirdi - Me ýoldaş Diwangulyýew, bu-da saňa ýadygärlik. Degişme goşgyny okap gülüşip otyrkak, ol üçünji goşgynam öňümize süýşirdi-de - Indi biraz ümsüm otyryň, häzir gazete gitmeli goşgyny ýazýan – diýdi. Şahyr suratdaky gyza guwanç bilen seretdi-de, ýapyrlyp, çep eli bilen kagyza çalt-çaltdan bir zatlar ýazdy. Soňra okap çykyp bir-iki sözüni düzetdi. - Alyň, ynha, size şahyrdan sowgat! Goşgyny okap onuň bir salymda dünýä inişine, şu gudratyň hut öz gözümiň öňünde bolup geçişine haýran galdyk. Şol ýazan goşgusy Surata seredip ….. 1 Beýle jellat gözi görmändim men-ä: Her gözüň içinde - giden bir dünýä. Birisinde – uçmah, birinde – dowzah, Entek ýaş ýigitsiň – uçmah aç sen-ä Menem şol dowzaha özümi urjak Gijesi-gündizi gazanyp günä 2 Lenin adyn sena edip diliňe Täze biledini alyp eline, Bu periniň bolup durşyna seret; Janym gurban Ogulnäzik geline. 3 Bedeniň mermerden ýasalan ýalak. Dodaklaryň pisse, gözleriň – çanak. Saňa aşyk boldy köp redaktor Ýok, ýok, köp däl, köp däl, ikije sanak! Ýok, ýeke! Ýeke! Olam - men! Kerim. 4 Bu mandatyň içinde näçe-näçe Ýeňiş bar. Näçe-näçe sapak bar. Näçe-näçe mekdep bar! Bu gözleriň içinde Näçe-näçe Güneş bar. Näçe-näçe zehin bar, Näçe-näçe edep bar! ------------------------------------------------ Kerim şahyr öz kitaplaryny çapa taýýarlaýşy-da täsinlikdi. Ol kitapda haýsy goşgynyň yzyndan haýsy goşgynyň gitmelidigini özi kesgitlärdi. Olary bölümlere bölerdi, suratlaryna-da juda ünsli serederdi.“Menzil”, “Ýedi ýaprak”, “Düýn, şu gün” atly ajaýyp kitaplaryny şahyr öz eli bilen taýýarlapdy.