Salam gadyrly we gadyrsyz hormatly agzalar, dostlar! Äleme belli türkmen alym şahyry Magtymguly Pyragynyñ aýdyp geçmedik sözi ýok bolsa gerek. Bu şahyryñ esasy dünýewi maksatlarynyñ biri-de, ýolundan azaşan ynsanlary yslam dini ideýasy bilen dogry ýola, dogry durmuşa çagyrmak bolupdyr. Ynsanlaryñ arasynda özüniñ kimligini, näme maksat bilen bu dünýäde ýaşap ýörenligini, bu dünýäde özüni nähili alyp barmalydygyny we ýene-de birnäçe durmuş meselelerine nähili çözgüt tapmalydygyny bilmän mal janawerler ýaly gezişip ýörenler hem gyt däl. Ine şol ynsanlaryñ hem okap, birazajyk pikir edip, oýlanyp many-mazmunly netije çykarmaly goşgularynyñ biri hem şu aşakdaky setirlerdir. Söwdagärlik kylyp bazar gezenden, Alsam nesihatym, gymmat ýagşydyr. Hatam bolup, günde gyzyl berenden, Köňülde edilen hümmet ýagşydyr. Bir mert ýagşy muhannesiň ýüzünden, Söweş güni sanjar ganym gözünden, Her kim tapylmasa aýdan sözünden, Dine müňkür bolan ýezit ýagşydyr. Haýr işin terk edip, bet iş yzlandan, Dost bolup, dostundan syryn gizländen, Hudany unudyp, ýalan sözländen – Läkin, lal oturyp, dymmak ýagşydyr. Kadyr Eýäm jismimizi bar eden, Biakyldyr hak işine ar eden, Bimahal salyngan bozuk köprüden, Jähennem üstünde syrat ýagşydyr. Bäş wagty berjaý kyl, musulman bolsaň, Bilip ahyrýetiň, gamyny iýseň, Janyň barlygynda haýyr gazansaň, Rahat ýatjak ýeriň – kümmet ýagşydyr. Söz manysy çykar bir ýagşy jaýdan, Bihabarlar aýra düşer Hudaýdan, Bäş wagty bilmegen bihabar baýdan, Ärsiz, pirsiz loly arwat ýagşydyr. Magtymguly, gördüň ýagşy-ýamany, Ýalançynyň bolmaz anty-imany, Bir ak öýe barsaň, almaz myhmany, Her kimiň öz ili – ymmat ýagşydyr.