15-nji oktýabrda Türkmenistanyň prezidenti Gurbanguly Berdimuhamedowyň gatnaşmagynda Aşgabadyň merkezinde gurlan kaşaň "Oguzkent" myhmanhanasynyň açylyş dabarasy boldy. Merkezi Aziýa sebitindäki uly naýbaşy myhmanhanany Türkmenistanyň Prezidentiniň Diwanynyň iş dolandyryş müdirliginiň buýurmasy boýunça "Buig Batiman internasional" fransuz firmasy gurdy. Bäş ýyldyzly myhmanhananyň umumy meýdany 70 müň inedördül metr bolup, onuň umumy bahasy 270 million ýewrodyr. Häzirki zaman binagärliginiň öňdebaryjy gazananlary, milli binagärligiň iň oňat däpleri we seýsmiki howpsuzlygyň ygtybarly ulgamy bilen üpjün edilen bu myhmanhana ýokary derejeli myhmanlary kabul etmek we iri halkara maslahatlaryny geçirmek üçin niýetlenendir. Oteliň üstündäki wertodrom ýokary derejeli myhmanlary aeroportdan göni wertolýotly bu myhmanhana alyp gelmäge hyzmat eder. Myhmanlaryň aeroportdan ulag bilen däl-de wertolýotly alnyp gaýdylmagy belli bir derejede olaryň howpsuzlygyny kepillendirer. "Oguzkent" myhmanhanasy 299 orunlyk bolup, olaryň 14-si prezident klass derejesindäki nomerlerdir. Mundan başga-da myhmanhanada kongresler merkezi hem bar. Myhmanhananyň beýikligi 67 metre barabardyr. Oteliñ gapdalyndaky awtobus duralgasy bolsa, sowadyjy hem-de gyzdyryjy enjamlar bilen doly üpjün edilendir. "Buig Batiman internasional" fransuz firmasy bäş ýyldyzly bu oteliň gurluşygyna 2008-nji ýylyň ýanwarynda başlapdy we binany 2009-njy ýylyň dekabryna çenli doly tabşyrmagy şert edinipdi. Emma muña garamazdan "Oguzkent" myhmanhanasynyň gurluşygy bir ýyla golaý gijikdirilip tamamlandy. Bäş ýyldyzly bu oteliň gurluşygy ýaňy başlananda onuň ady "Galkynyş" myhmanhanasy diýlip atlandyrylypdy. Ýöne bir ýyl töweregi geçensoň, onuň ady "Oguzkent" myhmanhanasy diýlip çalşyryldy. "Oguzkent" sözi bolsa, Oguzlaryň şäheri diýen manyny berýär. Çeşme: internet we metbugat habarlary esasynda ýazylan