Saňa „ýüregi daş ýaly” diýseler, ýüregiň ýumşaklygyna hem gözüň ýetýän bolsa, gynanma, sen olara aýt, adamlaryň teşneligini gandyrýan dury suwly çeşmeler hem daşlaryň arasyndan syzylyp çykýandyr. Gözelleriň boýuny-barmagyny bezeýän gymmatbaha göwherlerem daşlaryň arasyndan köwlenip alynýandyr. Diýmek, seniň ýüregiňde entek alara, buýsanara zat kändir. Saňa „baryp ýatan sada, juda ýönekeý” diýseler, hiç ruhdan düşmegin, sen olara aýt, ähli ajaýyplyklar ýönekeýlikden gözbaş alýandyr. «Sadalykdan zyýan çekilmeýändigi», ahyr işde seniň rüstem gelýändigiň hakda kän aýdylýandyr. Saňa „iki dilli” diýseler, ýöne sende bu gylyk ýok bolsa, töhmet üçin ýakaňy ýyrtmagyn, gaýta many al, ine sagatlaryň üç dilem bar. Gürrüň diliň köplüginde däl-de, olaryň edýän hereketinde. Sagadyň üç diliniň ählisi hem bir ugra aýlanýar. Üstesine-de, her uly dil hem-ä çalt aýlanýar, hem-de özünden kiçileriň hem haýallyk bilenem bolsa, öňe aýlanmagyna itergi berýär. Dilleriň ählisi biri-birine goltgy bolup, bir ugra sazlaşykly aýlanýan bolsa, ondan uly näme bar? Ýa-da boýuňa-syratyňa, görküňe-görmegiňe, ukybyňa-zehiniňe göwniýetmezçilik bilen garalsa, ýüzüňe bir söz suňşuryp, arkaňdan bir atjagaz dakyp galsalar, eger-eger ruhdan düşmegin. Eger-de sen kimdir biriniň adyňa ýanan ýaramaz sözi üçin birahatlanýan bolsaň, bu seniň özüňde ýok ýaramaz zatlar üçinem kelle agyrtýandygyňy aňladýar. Ünsüňi gowy zatlara, gözelliklere gönükdir, ilde ýagşy adamlar juda kändir. Bir näsaz sözüň täsirine berilme, her teýenä, ýaňsa ýa agzyňy alawladyp, ýa hyrçyňy dişläp jogap gaýtarjak bolma. Hiç haçan sen onuň bilen deň bolup bilmersiň, sebäbi oňa gaýtargy berseň, seniň oňa deňdigiňi däl-de, ondan pesdigiňi aňladýar. Ähmiýet bermän, bagyşlasaň welin, bu seniň beýikligiň bolup durýar. Onsoňam, asmanlara pitjiň atsaň-da, daglara barmak çommaltsaň-da, olar şol mizemezligini, belentligini saklap galýarlar, çünki, güle tiken diýeniň bilen, onuň görki egsilmeýär. Doňzuň agzy degeni bilen deňziň suwy hapalanmaýar. Müň dürli at dakyber, gül elmydama güllügine galýar. Sen hem beýikligiňe gal!