Türkmenistanda eýýäm üç ýyl bäri wideoprokatlar ýok. Onuň deregine DVD disklerde ýazylan kinodyr aýdymlary satýan hususy dükanlar bar. Mundan 4-5 ýyl öňem wideokassetalarda, CD-DVD disklerde ýazylan kinolary prokatyna berýän nokatlar bolardy. Ýöne tehnikanyň aşa arzanlamagy we Türkmenistanda awtorlyk hukugynyň hiç bir babatda gözegçilikde saklanylmaýanlygy sebäpli, wideoprokat düşewünt getirmän başlady. Wideopiratswonyň aşa ösmegi netijesinde Türkmenistanyň islendik nokadynda bary-ýogy 4 manada owadan upakowkaly DVD diskli kino satyn alyp bolýar. Özi hem şol upakowkanyň içinde 2 DVD disk bar. Her diskde bolsa azyndan 5-6 kinofilm bar. $1,40 türkmenistanlylar Golliwudyň millionlarça dollara düşürýän kinolarynyň 12 sanysyny görüp bilýärler. Ýöne ilat arasynda şunça kino üçin $1,40 tölemäge puluny dözmeýänler hem bar. Olar kino disklerini satyn alan tanyşlaryndan öz kompýuterlerinde arassa DVD disklere göçürinip alýarlar. Sebäbi bir arassa DVD diskiň bahasy 40 teňňe, ýagny $ 0,14 barabar bolýar. Kinofilmleri öz erkine göçürip, gök-önüm satylýan lawkalaryň gapdalynda-da arzan bahadan satuwa çykarýanlaryň aşa köplügi sebäpli, ýörite litsenziýa boýunça döwlete salgyt töläp, kino-wideo söwdasyny edýän “Gülüstan”, “Gamma rekords” ýaly studiýalaryň girdejisi hem juda pese gaçýar. Sebäbi bu studiýalaryň satuwa çykarýan diskleri 18-20 manat aralygynda. Ýöne “Gülüstan”, “Gamma rekords” studiýalarynyň özleri hem bir tarapdan piratlar. Olar ýaýradýan kino-saz önümleri üçin hiç bir daşary ýurt kinokampaniýalary bilen ylalaşyk baglaşmaýarlar. Olar diňe öz söwdasy üçin salgyt töleýärler. Şu ýylyň başynda ýurtda awtorlyk hukugynyň güýje girizilendigine garamazdan, kinopiratstwo garşy hiç hili göreş çäreleri alnyp barylmaýar. Bu meselede Türkmenistanyň ýeke-täk kinostudiýasy hem jebir çekýär. Kinostudiýa tarapyndan düşürilen täze film heniz döwlet komissiýasyndan geçmänkä piratlar tarapyndan tutuş bazarlarda doldurylýar. Çeşme http://www.chrono-tm.org/tm/archives/157