* * *
Eý, sen Aýsyz gije, ýeke-täk gije,
Bilýän indi gaýtalanmaz bu pursat.
Wah, neneň razylyk berdikä dilim,
Ýarym gaýtmak üçin soranda rugsat?!

Eý, sen Aýsyz gije, ýeke-täk gije,
Şaýat bolduň syrlarymyň baryna.
Indi ýatlamalam geçip dur ýazga,
Hyýalymda,ylham bilen garyla.

Eý, sen Aýsyz gije, ýeke-täk gije,
Gara şalyň halas etdi gözlerden.
Seret "gybatlaram" galypdyr uklap,
Surnugansoň netijesiz gözlegden.

Eý, sen Aýsyz gije, ýeke-täk gije,
Ýarymyň jemaly Aý bolar saňa.
"Aýsyz gije" ýalňyzlykdan zeýrenme,
Indiki duşuşyk taý bolar saňa!
Gülşirin HANOWA
16.09.2021 8:58