Bagtymmy sen? Maňlaýa ýazylmadyk,
Ak atymmy arzuwlap münülmedik?
Ýa-da ol jylawsyz näzik duýgymmy?
Göwhermi sen boýnuma düzülmedik ?

Tesellimmi ezýet çeken mahalym?
Böwedimmi gelen wagty gaharym?
Gyşda doňan ýüregimi eretjek,
Belki sensiň, çogum boljak baharym .

Bedenime kuwwat berýän ganymmy?
Yşk ýolunda apalanýan janymmy?
Mähir siňdirilen nepis keşdeli,
Höwes eden geýilmedik donummy?

Hossarymmy, ýakynymmy- ýadymmy?
Hupbat bassa köşeşdirýän dadymmy?
Ah,......... serimi alan sorag belgiler!
Jemläýin men sizi - zaryn aýdymmy.

Ýogsam gutarmaýar meniň bu gaýgym,
Ýetilmedik arzuwlarym-tamam siz.
Asyl sen bolmaly paşmadyk (ilkinji) söýgim,
Ömürboýy gursakdaky ýamam siz.

Nartäç Ýusupdurdyýewa