Asman indi, ýer çöwrüldi,
Göwün zar-zar uwlady, heý!
Arzuwlar ýele sowruldy,
Hijran ýeli şuwlady, heý!

Demim tükenmedi şu hal,
Ýogsa, ýeterlikdi ahwal...
Janly ölä döndüm.
Ahmal,
ömrümi gam suwlady, heý!

Many galmady ömürde,
Ýürek gamda, jan jebirde...
Aýdymlam ýöne „hümürdi“.
Ýetim bagtym çüwmedi, heý!

Wah, törüme girmejegim...
Indi gülün tirmejegim...
Gözlem gördi görmejegin ―
Hasratlarmy köwledi, heý!

Söýdügimi gördüm gelin,
Köýdügimi görüň!
Geliň!
Diýmejegni diýdi dilim:
Ýasymy il toýlady, heý!..


Sapa Hommadow