Bagty bolup bar! Arzuwlarym doly durmuş toýuňa, Ýazgydyň, nesibäň nagty bolup bar! Ykbal ýodasynda baran öýüňe, Asmanyň aýyndan ýagty bolup bar! Başyňa täç edip gyzlyk edebiň, Bagta ýorgun Taňryň sowgat edenin, Ýar ýolunda dursun süňňüň, bedeniň, Öý bezegi, arşy-tagty bolup bar! Rysgalna rysgal goş, şatlygna şatlyk, Ak ýollarda bolsun gadamyň batly, Arzuw edýän söýgi bilen abatlyk, Agzybirlik gül daragty bolup bar! Rysgal insin ak unuňa, elegňe, Perişdeler „ämiýn“ diýsin dilegňe, Guwanyp gez munda bagtyň gelenne, Söýginiň mynasyp wagty bolup bar! Toý gününde, hoş sözlerden dadanda, Bagtdan gowy arzuw bolmaz adamda. Gelin bolup, bir ojaga ädeňde Asmanyň aýyndan ýagty bolup bar! Alla kimi ýazan bolsa alnyňa, Şol ýigidiň diňe bagty bolup bar! R.Gylyjow