fc ashgabat - 3 httu - 0 Ýokary liganyň klublarynyň arasynda futbol boýunça Türkmenistanyň çempionatynyň 13-nji tapgyry "Aşgabat" toparynyň Halkara türkmen-türk uniwersitetiniň ("httu") toparyndan 3:0 hasabynda ýeňiş gazanmagy bilen tamamlandy. Hasaby oýnuň 34-nji minutynda Guwanç Hangeldiýew açdy. Oýnuň ikinji ýarymynyň başlanmagyndan 8 minut geçen soň ol hasaby iki esse artdyrdy. Ýeňişli pökgini bolsa oýnuň tamamlanmagyna 7 minut galanda Serdaraly Ataýew geçirdi.

Aman Goçumowyň tälimini alanlaryň oýnuň birinji aýlawynda ýurduň geçen ýylky çempionyndan 0:2 hasabynda ýeňilendigini bellemek gerek. Gepiň gerdişine görä aýtsak, "Aşgabadyň" bassyr üçünji gezek ýeňiş gazanmagy, oňa 20 oçko bilen ýaryş tablisasynyň altynjy ornuna çykmagyna mümkinçilik berdi. HTTU bolsa özüniň 24 oçkosy bilen bäşinji orny eýeleýär. HTTU bilen bir hatarda şonça oçko gazanan "Merw" bilen "Lebap" bolsa degişlilikde 3-nji we 4-nji orunlary eýeleýärler. yöne lebaplylar 1 oýny az oýnadylar. Ikinji orunda bolsa Türkmenistanyň Kubogynyň häzirki eýesi "Altyn asyr" barýar, onuň hasabynda 28 oçko bar. Çempionatda 36 oçko gazanan "Balkan" öňdeligi eýeleyar. Oňa altyn medaly gazanmak üçin galan oýunlaryň üçüsinde iki oçko toplamak ýeterlikdir. Çeshmesi: Türkmen döwlet habarlary