Yşkdan joşup goşgy-gazallar düzýän,
Ýürekden söýülýän, söýýän adamdyr.
Dünýäň gözelligine guwanyp gezýän,
Ýürekden söýülýän, söýýän adamdyr.

Durmuşdan öziçe geregin alýan,
Ýaryny görende mylaýym bolýan,
Ýaz kalby arzuwdan, mähirden dolýan,
Ýürekden söýülýän, söýýän adamdyr.

Çekip bilýän yşk derdiniň awusyn,
Duýup bilýän ýürekleriň agysyn,
Hemme zatdan belent tutýan namysyn,
Ýürekden söýülýän, söýýän adamdyr.

Kimiň ruhybelent, keýpi kök bolsa,
Gökde pelpelleýän gumry dek bolsa,
Kir-kimirsiz kalby mydam ak bolsa,
Ýürekden söýülýän, söýýän adamdyr.

Nartäç Ýusupdurdyýewa