Terkidünýäligi öwreder ile, Özi galla basar altyn, zer bile. * * * Alymyň bileni söz bolsa ýalňyz, Batmaz köňüllere aýdany hergiz. * * * Alym oldur egri ýola gitmesin, Ne ile aýdyp-da özi etmesin. * * * Goý goçaklyk lapyny, ärlik dawasyny zyň, Deňdir aýal, ärligiň nebsinden ejiz bolsaň. * * * Bir agyzy süýjütgin eger gelse eliňden, Ýumruk urmak bir agza bu däldir ärlik bilseň. * * * Asly toprakdandyr adam oglunyň, Bolsun gylygyň hem misli gara ýer. * * * Ýoldaş eger howluksa, ýoldaş däldir ol oňly, Hiç köňlüňi baglama, saňa bent däle köňli. * * * Giň wagtynda goluň, golda garyby, Onuň alkyşyndan bela dep bolar. Ber, eger zarynlap dilese gedaý, Bermeseň galtaman gaňyryp alar. * * * Her oýun-mazadan, aýdylan sözden, Parasatly kişi bir sapak alar. Samsyga hikmetden ýüz bap okasaň, Ýakmaz gulagyna, oýunjak bolar. * * * Saz çyksa eger-de dutaryň heňi, Gulagyny burmaz bagşynyň eli. * * * Daň bilbili bilermiň, maňa ne diýdi säher, Sen özüň niçik ynsan, sen söýgiden bihabar. Arabyň goşgusyndan düýe oýnap galkynar, Dört aýakly bir mal sen, lezzet duýmasaň eger.