Hormatly müşderiler! "TürkmenTelekom" döwlet elektrik aragatnaşyk kärhanasy 1-nji iýuldan başlap ADSL INTERNET hyzmatynyň nyrhlaryny peseltdi we "Öý üçin Internet" diýlip atlandyrylýan täze nyrh meýilnamany girizdi. Adyndan belli bolşy ýaly, bu nyrh meýilnamadan guramalar, edaradyr kärhanalar peýdalanyp bilmezler. "Öý üçin Internet" nyrh meýilnamasy boýunça ADSL INTERNET hyzmatyna birikdirilmek üçin modem bilen birlikde 274 manat tölemeli. Hödürlenýän täze ADSL Internet nyrh meýilnamasynda belli bir trafik möçberinde hem-de tizlik boýunça nyrh goýulýar. Mysal üçin, bu nyrh meýilnamanyň iň arzan görnüşi 64 Kb/s tizlikli, bir aý çäklendirilen trafigi 512 Mb bolup, onuň bahasy 57 manat. Çäklendirilen trafik möçberinden daşary ulanylan 1 Mb trafigiň bahasy 0.85 manat. "TürkmenTelekom" döwlet elektrik aragatnaşyk kärhanasynyň ADSL INTERNET hyzmatynyň bu täze nyrh meýilnamasy öňki nyrh meýilnamalardan tapawutlylykda ilat köpçüligi üçin has elýeterli bolup durýar. Emma ÇÄKLENDIRILMEDIK ADSL INTERNET hyzmatynyň bahasy wagtlaýynça öňküligine galýar. "TürkmenTelekom" -yň ÇÄKLENDIRILMEDIK ADSL INTERNET hyzmatynyň iň arzan görnüşi 64 Kb/s bolup, bahasy 607 manat. Şeýle hem "TürkmenTelekom" döwlet elektrik aragatnaşyk kärhanasy 1-nji iýuldan başlap DAOLAB INTERNET hyzmaty üçin täze nyrh meýilnamalary girizmegi meýilleşdirýärdi. Girizilmegi meýilleşdirilýän bu nyrh meýilnamada ÝEŇILLIKLI we ÇÄKSIZ atly 2 sany DAOLAB nyrh meýilnamasy bolar. ÝEŇILLIKLI nyrh meýilnamada DAOLAB INTERNET hyzmatynyň bahasy 1 Mb trafik üçin 0.06 manat bolar we öňki hereket edýän müşderi tölegi hem aradan aýrylar. ÇÄKSIZ nyrh meýilnamada DAOLAB INTERNET hyzmatynyň bahasy aýda 50 manat. Täze nyrh meýilnamalar ýakyn wagtlarda giriziler! Hormatlamak bilen: Toýly SAZAKOW we "TürkmenTelekom" döwlet elektrik aragatnaşyk kärhanasynyň işgärleri.