Eje, guş deý uçup gitsem-de ir-giç
Ganat ýaýyp gelerin seň ýanyňa.
Hem gaşyňda ýüzüm sallar otyryn
Düşünmän nämüçin aglaýanyňa.

Bolmalysy şeýledir-dä, ejemiz
Ekläp-saklap, ýaňy sana goşanda,
Gitmek bilen boluberýäs, diýýäs-de:
"Eje, men-ä ugramakçy, hoş, onda".

Eglenjekdim entek seniň ýanyňda
Kiselem aşykly, jübim şänikli.
Sen pikirem eden dälsiň ogluňa
Başga biri bolar öýdüp şärikli.

Ýöne nirde bolsam-da men, şu mekan
Hem mydam seň mährem keşbiň küýseler.
Emma, eje, aglamagyn, iru-giç
Iller: "Indi ol biziňki" diýseler...