Беркарар Ватанымызда адам барадакы алада дөвлет сыясатымызың эсасы илери тутулян угурларының биридир. Юрдымызың илатының яшайыш-дурмуш шертлерини хас-да говуландырмак барада ил-юрт бәхбитли ишлериң алнып барылмагы «Дөвлет адам үчиндир» диен ынсанпервер йөрелгесиниң иш йүзүнде дурмуша гечирилйәндигиниң айдың шаядыдыр. «Әхли обаларымызы ве шәхерлеримизи зерур болан дурмуш ве медени десгалар билен долы үпҗүн этмек, адамларың яшамагы үчин әхли оңайлы шертлери дөретмек бизиң эсасы максадымыздыр. Биз өңде гоян шу максадымыза долы етйәнчәк, бу угурда алып барян ишлеримизи ызыгидерли довам эдерис» диййән Түркменистаның Президентиниң алып барян әгирт улы ишлериниң нетиҗесинде, себитиң бинәгәрлик дүрдәнеси дийлип атландырылян гөзел пайтагтымыз Ашгабат шәхеримиз гиң герим билен өсйәр ве хас-да гөзеллешйәр. Ак мермерли Ашгабат шәхеримизде тәзе, дөвребап биналарың гурлушыгы гүйчли депгинде алнып барыляр ве диңе 2014-нҗи йылда әгирт улы гурлушык мейданчасына өврүлен овадан пайтагтымызда тәзе биналарың 65 санысы уланылмага берилди. Гечен йылың ахырында болса себитде иң ири «Беркарар» сөвда-дынч алыш меркезиниң аҗайып бинасы ачылып уланмага берилди. Хәзирки вагтда хем пайтагтымызда 200-ден говрак десгаларың гурлушыгы алнып барыляр. Шейле хем гөзел пайтагтымызы топлумлайын абаданлашдырмак, онуң җемагат ве хоҗалык дүзүмини өсдүрмек хем-де инженерчилик-коммуникация улгамыны кәмиллешдирмек мөхүм меселелериң бири болуп дуряр ве бу угур боюнча шәхеримизде бирнәче ишлер амала ашырыляр. Хәзирки вагтда пайтагтымызы гөзел кешбе гетирмек максады билен шәхеримизиң «8-нҗи Март» дийилип атландырылян яшайыш топлумында, өңки Лелинград колхозында, Н.Помма ве Физкультурный көчелеринде арассалайыш ишлерини гечирмеклик ишлери алнып барыляр. Бу җайлар 1990-нҗы йыллардан өң гурлан көне җайлар болуп, оларда яшайыш үчин зерур болан улгамларың, ягны лагым ве зейкеш улгамларының болмазлыгы, зил-зибиллериң топланылмагы билен арассачылык кадаларының берҗай эдилмезлиги Ашгабат шәхеримизи топлумлайын абаданлашдырмакда белли бир дереҗеде кынчылыклары дөредйәндигини беллемек зерурдыр. Дөвлетимизде адам барада эдилйән аладаның нетиҗесинде болса бу ерлердәки көне яшайыш җайлары йыкылан раятларымыз шәхеримизиң Парахат-7 яшайыш топлумындан, Көши ве Гуртлы яшайыш җай топлумларындан әхли аматлыклары болан дөвребап җайлар билен үпҗүн эдилйәр. Ак мермере бесленен Ашгабат шәхерини абаданлашдырмак боюнча алнып барылян чәрелериң нетиҗесинде болса, хәзирки вагтда арассалайыш ишлери гечирилйән ерлерде болса кашаң ве дөвребап биналар гурулан. Шонуң билен бирликде хем шәхеримизиң кичи этрапларыны тертиплешдирмеклик үчин яшайыш җайларында гурлан гошмача десгалары сөкмек, җайларың арасындакы ёллары ве ян ёдалары абаданлашдырмак ишлери алнып барыляр. Көп гатлы яшайыш җайларында гошмача десгаларың биругсат гурулмагы, җайларың арасындакы ёлларың ве ян ёдаларың гысылмагы нетиҗесинде болса «Янгын сөндүриҗи» ве «Тиз көмек» автоулагларың яшайыш җайларының арасында бөкденчсиз херекет этмегине улы пәсгелчиликлери дөретмек билен раятларымызың аматлы шертлерде яшамакларына белли дереҗеде кынчылыклары дөредйәндигини беллемек болар. Шонуң үчин хем шәхеримизде гечирилйән бу чәрелериң пайтагтымызың яшайҗыларының кануны хукукларыны ве бәхбитлерини гормак максады билен ерине етирилйәндигини болса хеммәмизиң билмегимиз зерурдыр. Гөзел пайтагтымыз Ашгабат шәхеримиз юрдумызда гечирилйән өзгертмелериң нетиҗесинде чалт депгинлер билен өсйәр ве хас-да гөзеллешйәр. Хеммәмизиң билшимиз ялы 2017-нҗи йылда түркмен пайтагтында Япык биналарда ве сөвеш сунгаты боюнча 5-нҗи Азия оюнларының ярышлары гечирилер. Түркменистан дөвлетимизиң Меркези Азия себитинде илкинҗи болуп шейле абрайлы оюнлары гечирмек хукугына эе болмагыны улы буйсанч билен беллемек болар. Шоңа лайыклыкда хем Азияда-2017-ә тайярлык гөрмек ишлериниң чәгинде Олимпия шәхерҗигиниң гурлушыгы гиң геримде алнып барыляр. Дөвлет Баштутанымызың 2015-2016-нҗы йылларда Ашгабат шәхерини өсдүрмегиң максатнамасының дурмуша гечирилмеги билен Битарап дөвлетимизиң гөзел пайтагты Ашгабат шәхеримиз Азияда 2017-ә дүнйә дөвлетлеринден гелҗек көп санлы мертебели мыхманлары хас овадан, хас нурана кешби билен гаршылар.