Ýeňil agramda UFC-niň çempiony Islam Mahaçew 18-nji ýanwarda Los-Anjelesde geçiriljek UFC 311 ýaryşynda Arman Sarukýana garşy titul goragyny geçirer. Bu barada Abdulmanap Nurmagomedow adyndaky garyşyk başa-baş söweş mekdebiniň resmi sosial ulgamlaryna salgylanyp, RIA Nowosti habar berýär. “UFC 311, Los-Anjeles, 18-nji ýanwar. Islam Mahaçew bilen Arman Sarukýan” – diýlip, guramanyň Instagram sahypasynda aýdylýar. Ilkibaşda söweş 26-njy oktýabrda Abu-Dabidäki UFC 308 ýaryşynda geçirilmelidi, ýöne Mahaçewiň eline şikes ýetmegi sebäpli söweşi yza süýşürmeli boldy. Sarukýan 2019-njy ýylyň aprel aýynda UFC Fight Night-de Mahaçew bilen ilkinji söweşinde ýeňlendigi üçin ar almak isleýär. Şol söweş Sarukýanyň UFC-de ilkinji çykyşy bolupdy. Mahaçew emin agzalarynyň biragyzdan karar bermegi bilen ýeňdi. 33 ýaşly Mahaçew agram derejesine garamazdan UFC-niň reýtinginde birinji orny eýeleýär. Onuň hasabynda 26 ýeňiş we bir ýeňliş bar. 28 ýaşly Sarukýanyň hasabynda professional derejede geçiren 25 söweşinde 22 ýeňiş bar.