Kamerundan 25 ýaşly zenan boksçy Sindi Winner Janke Ngamba taryhda Olimpiýa medalyny gazanan ilkinji bosgun boldy. Ýekşenbe güni, 4-nji awgustda, ol emin agzalarynyň biragyzdan karar bermegi bilen utuk boýunça fransiýaly Dawina Mişeli ýeňip, 75 kg çenli agram derejede boks boýunça ýarym finala çykdy. Penşenbe güni Ngamba finalda ýer almak üçin panamaly türgen Ateýna Baýlon bilen duşuşar. Ýarym final söweşiniň netijesine garamazdan, Ngamba eýýäm münberde ornuny üpjün etdi. Ol ýeňlen ýagdaýynda bürünç medal alar, eger finala çyksa altyn medal ugrunda göreşer. Pariždäki Olimpiýa oýunlarynyň açylyş dabarasynda Ngamba Olimpiýa bosgunlar toparynyň baýdak göterijisi boldy. Toparyň düzümine 11 ýurtdan 36 türgen girdi, olar sportuň 12 görnüşinde bäsleşýärler. BMG-niň bosgunlaryň işi boýunça Ýokary komissarynyň müdirligi we Halkara Olimpiýa Komiteti Sindi Ngambanyň ýarym finala çykmagyna teswir berip, dünýä derejesindäki sport ýaryşlarynda bosgunlary birleşdirmegiň we goldamagyň möhümdigini belledi.