Singapurda sportyñ taryhda ilkinji gezek ýetginjekleriň tomusky Olimpiada oýunlarynyň açylyşynyň ody ýakyldy. 14 ýaşdan 18 ýaşa çenli dünýäniň dürli künjeginden bolan 3500-den gowrak sportsmenleriň bäsleşjek bu Olimpiadasy 14-nji awgustdan 26-njy awgusta çenli dowam eder. Marina Bay aýlagynda "ýüzýän" stadionynda bolup geçen yetginjekleriñ tomusky Olimpiadasynyň dabaraly açylyşyna 204 ýurtdan, şol sanda Türkmenistandan hem sportsmenler gatnaşdy. Oduň, Suwuň, Şuglanyň şüweleňine öwrülen bu baýramçylygyň yzyndan stadiondan Olimpiada gatnaşýanlar geçdiler. Münberlerdäkileriň şowhunly garşylamaklarynda Türkmenistanyň milli Baýdagyny 17 ýaşly aşgabatly, boks boýunça Halkara sport ussady Nursähet Pazzyýew göterip geçdi. Türkmen sportsmenleriniň şeýle ajaýyp dabaraly sport baýramçylygyna gatnaşmaklary, Türkmenistanda sporta berilyän ünsüñ yokarydygyna mysal bolup durýar. Türkmenistanly sportsmenler ilkinji gezek geçirilýän ýetginjekleriň bu Olimpiada oýunlarynda sportuň dört görnüşi: agyr atletika, suwda ýüzmek, boks we dzýudo boýunça çykyş ederler. Dünýäniň uly sport forumynda biziň ýurdumyza wekilçilik etmek: agyr atletikaçylar Ihtiýar Matkarimowa (56 kilograma çenli agramda), Baýmyrat Orazdurdyýewe (62 kilograma çenli agramda), boksçy Nursähet Pazzyýewe (69 kilograma çenli agramda), dzýudoçy Jennet Geldibewa (52 kilograma çenli agramda) we yüzüji Jennet Saryýewa (50 we 100 metre çenli erkin ýüzmek) ynanyldy. Ýetginjekleriň Olimpiadasyndaky sportuň görnüşlerinde bäsleşikleriň düzgüni ulylaryň bäsleşiklerinden käbir ýagdaýda tapawutlanýar. Mysal üçin: basketbol aslynda bolmaly meýdançanyň diňe ýarysynda (14 metrlik) oýnalar. Her bir toparda üç oýunçy oýnap, her biri bäş minutdan bolan 2 tapgyr oýnalar hem-de hüjüm üçin 10 sekunt berler. Futbolda oýnuň birinji we ikinji ýarymlarynyň her biri 40 minut dowam eder. Sportuň bäş görnüşi boýunça häzirki zaman bäsleşigi diňe dört görnüşde - fehtowaniýe, suwda ýüzmek, ylgamak we nyşana ok atmak boýunça geçiriler. "-Ýetginjekleriñ olimpiýa Oýunlarynyň hemişelik Oýunlara öwrülmegini umyt edýärin" - diýip, HOK-yň (halkara olimpiya komiteti) Prezidenti Żak Rogge Olimpiadanyň dabaraly açylyşynda aýtdy. Yeri gelende aytsak, ikinji şeýle Olimpiada, yagny, indiki yetginjekleriñ olimpiadasy 2014-nji ýylda Hytaýyň Nankin şäherinde bolup geçer. Bizem bu ýaryşda yaş türkmen türgenlerimize uly yeñişler gazanyp watanmyza döşleri altyn medally dolanmaklaryny arzuw edyaris! Üstünlik hemrañyz bolsun, olimpiaçylar!