Hezreti Ebu Bekiriň(Allah ondan razy bolsun!) bir hyzmatkäri bardy. Ol işläp hak-heşdek gazanardy. Bir gije ol hödür-kerem edip nahar getirdi. Hezreti Ebu Bekir-de ondan bir lukma agzyna atdy. (Mundan ozal naharyň nireden getirilendigini we nähili ýol bilen gazanylandygyny soraýan Hezreti Ebu Bekir bu gezek soramagy unudypdy). Soňra hyzmatkär ol naharyň jahylyýet wagtynda pal atyp alan gazanjyndandygyny aýtdy. Muny eşiden Hezreti Ebu Bekiriň(Allah ondan razy bolsun!):"Bolsa-da sen meni tas heläk edipdiň" diýip, ýuwdan bir lukmasyny gusup çykarmak üçin, elini bokurdagyna çenli sokdy. Emma hiç hili netije bermedi. ýanyndakylar köpräk suw içseň gusarsyň diýensoň, bir okara suw sargady. Suw getirdiler, ony içdi we gusmaga başlady. Ahyry-da şol bir bölek lukmany çykaryp taşlady. Ondan: "Allah saňa merhemet etsin. çeken ähli jebir-jepalaryň bir bölek lukma üçinmi?" diýip soralanda, ol şeýle jogap berdi: "Eger-de bu bir bölejik lukma başga hili çykman, janymyň bahasyna çykýan bolsa-da çykarardym. çünki, men Allahyň Resulynyň(sallallahu aleýhi we sellem):"Haram bilen önüp-ösen jesede iň laýygy dowzah odudyr" diýenini eşitdim. şonuň üçin bedenime bir bölejik haram lukmanyň aralaşmagyndan hem gorkdum" diýdi. Eziz doganlar, bu meselede artyk söze zerurlyk barmy? Onda Allah biziň hemmämize halal ryzk, ynsap we abraý berewersin!