Şyhym, saňa duşmandyr,
Ýary-ýardan aýyran.
Soňy saňa puşmandyr,
Ýary-ýardan aýyran.

Ataň bagry baş bolsun,
Eneň gözi ýaş bolsun,
Müň bir bela duş bolsun,
Ýary-ýardan aýyran.

Söýgüli ogly ölsün,
Gözüniň ýaşyn çalsyn,
Mejnun gargyşyn alsyn,
Ýary-ýardan aýyran.

Meni ýandyran ýansyn,
Ýanan çyragy sönsün,
Ähli öwlady ölsün,
Ýary-ýardan aýyran.

Ölmesin hem gülmesin,
Bagry ýerden galmasyn,
Ýeke zürýat galmasyn,
Ýary-ýardan aýyran.

Magtymguly diýr, gördüm,
Hak işine ten berdim,
Ýaradana tabşyrdym,
Ýary-ýardan aýyran.