Bende, sen bet işe batyrlyk etme,
Aldyňda goýarlar ol gün bu işi!
Nebse uýma, şeýtan raýyna gitme,
Hajalata goýar, bilgin bu işi!

Nebsiň aýdar: "Urgun bu bir hözirdir! "
Janyň aýdar: "Haý, dur , taňry häzirdir! "
Sen görmeseň, ol-ha saňa nazyrdyr,
Utangyn, eýmengin, goýgun bu işi!

Bir ýolda günä bar, bir ýolda sowap,
Arasatda senden istärler jowap.
Halala hasap biýr harama-azap,
Şeki ýokdur, ýada salgyn bu işi!

Ömrüň geçip barýan ýazdyr bir sagat,
Ne bolar, bu ýazda eýleseň tagat.
Sowaba şatlyk bar, jürme-hyjalat,
Boýnuňa almagyn, gelgin, bu işi!

Başyň göge, göwsüň ýel göterme,
Köňlüňe gorkyny çala getirme.
Ýürekde ýok sözü tile getirme,
Yhlas gulagyna çalgyn bu işi!

Mysapyr men, mukym işin gurar sen,
Bibaka dünýäde niçe durar sen.
Munda ne iş etseň, anda görer sen,
Ýagşydyr, ýamandyr ol gün bu işi!

Şeýtan aýdýar: "Şirin işdir, azagoý! "
Rahman aýdýar: "Nebs umydyn üzegoý!"
Magtymguly: ''Tur, goluňny köze goý!"
Eger döze bilseň, kylgyn bu işi!

Bilim, Нежная леди tarapyndan 3 years ago
Teswir ýazmak üçin Içeri gir