Tapmas sen

Niçe işi akyl bilen jem etseň,
Pelek çaşyr, bir gün hasap tapmas sen.
Magtymguly.

Bu durmuşyň baş-aýagy sowaldyr,
Müň oýlanyp, hiç bir jogap tapmas sen.
Zemini-de, Asmany-da hyýaldyr,
Köňül tümlük bolsa aftap tapmas sen.

Ir ertirde ak sähradan gül gözläp,
Ýüreklere tarap barýan ýol gözläp,
Ýagşy dileg-niýetleri bol gözläp,
Ne ýagşy söz, ne-de sogap tapmas sen.

Dolan Aý garaňky gijäň bagtydyr,
Aý dek göwnüň mähre mätäç wagtydyr,
Gözleriň ýaşyny şemal togtadar,
Kalba teselli dost-sebäp tapmas sen.

Maňlaýa ýazylmyş takdyry ezel,
Ol ömür ýoluna özendir özen.
Kysmat düýşümde-de bagrymny ezer,
Takdyryňdan özge azap tapmas sen.

Nebir yhlaslary satyp giderler,
Göz dikip, göz bilen atyp giderler,
Gözýaş bir puşmandyr — ýudup giderler,
Haýransyň, akyla togap tapmas sen.

Gülüstan diýr, dostmy, derdiň aňlagaý,
Saňa umyt etgeý, ynam baglagaý,
Tut elinden, aşa oda daglama,
Yşkyňda şeýle çyn kebap tapmas sen.

Gülüstan MÄTÝAKUBOWA