Bedenterbiýe we sport ulgamynda durmuşa ornaşdyrylýan ajaýyplyklar ösüp gelýän ýaş nesli has galkyndyryp, täze üstünliklere ruhlandyrýar. “Türkmenistan. Sport” teleýaýlymynyň açylmagy, Ginnesiň rekordlar kitabyna girizilen ak şäherimiz Aşgabatda gurulýan Olimpiýa şäherjigi, 2017-nji ýylda geçiriljek Ýapyk binalarda we söweş sungaty boýunça V Aziýa oýunlary, bedenterbiýe we sport ulgamynda täze Kanunyň kabul edilmegi, Türkmenistanyň “TürkmenÄlem” 52* E” ilkinji aragatnaşyk hemrasynyň älem giňişligine çykarylmagy, gurulýan döwrebap hem ajaýyp sport desgalary... – bu türkmen halkynyň ykbalynyň geljeginiň bagtyýardygyna şaýatlyk edýär. 2015-nji ýylyň 25-nji dekabrynda Siziň Türkmenistanyň Ministrler Kabinetiniň agzalary we ýurdumyzyň Howpsuzlyk Geňeşiniň agzalary bilen bilelikde geçiren giňişleýin mejlisinde Mukaddes Garaşsyzlygymyň şanly 25 ýyllyk ýubileýi belleniljek 2016-njy ýyly “Mirasa sarpa goýmak – Watany özgertmek” şygaryna beslemek baradaky öňdengörüjilikli hem paýhasly teklibiňiz Berkarar döwletimiziň bagtyýarlyk döwri diýlip atlandyrylýan şu günki gün halkymyzyň hem ýurdumyzyň ykdysady, ruhy-medeni, aň-bilim taýdan ýokary göterilişidir. Bu geljekki sagdyn döwletiň binýadydyr. Sagdyn döwlet bolsa sagdyn jemgyýet, sagdyn raýat, ylymly-bilimli, dünýäniň ösüşinden doly habarly, oňa goşulmaga hemmetaraplaýyn taýýarlykly sagdyn nesliň alamatydyr. Şeýle umumy sazlaşyk bolsa hökmany suratda sagdyn hem-de ruhubelent döwleti kemala getirýär. Öňümizdäki tomusky Olimpiýa oýunlary hem muňa aýdyň mysaldyr. 2016-njy ýylyň 5-21-nji awgusty aralygynda Günorta Amerika döwletleriniň biri bolan Braziliýa Respublikasynyň paýtagty Rio-de-Žaneýro şäherinde sportuň görnüşleri boýunça XXXI tomusky Olimpiýa oýunlary geçirilýär. Onda Türkmenistanyň milli ýygyndy toparlary sportuň dzýudo, boks, ýeňil atletika, agyr atletika we suwda ýüzmek boýunça çykyş edereler. Bu Olimpiýa oýunlaryna Türkmenistanyň sport wekiliýeti – 9 türgen, 6 tälimçi, 8 resmi adam, 1 habarçy, 1 lukman, jemi 25 adam düzümi bilen gatnaşmagy meýilleşdirýär. Olar 2016-njy ýylyň 28-nji iýulyndan 18-nji awgusty aralygynda XXXI tomusky Olimpiýa oýunlaryna gatnaşmak üçin Braziliýa Respublikasynyň paýtagty Rio-de-Žaneýro şäherinde bolarlar.