Соӊкы вагтларда интернет улгамында Түркменистаныӊ Овганыстан билен серхединде кәбир дартгынлылыгыӊ йүзе чыкяндыгы, Овганыстандакы «талып» топарларыныӊ херекетлерини ишҗеӊлешдирйәндиклери билен баглы вакалар барада макалалара душ гелмек боляр. Оӊа мысал хөкмүнде гечен йылда «талып» топарлары тарапындан түркмен серхетчилериниӊ бирнәчесиниӊ атылып өлдүрилендиги барада маглуматларыӊ вагтал-вагтал беян эдилип дуруландыгыны гөркезип болар. Шонуӊ билен бирликде, түркмен-овган серхединдәки дартгынлылыгыӊ артяндыгы гөркезмәге чалышылян ягдайлар чап эдилйәр. Лебап велаятыныӊ Көйтендаг этрабыныӊ Акгумолам обасы түркмен-овган серхедине голай ерлешйән обаларыӊ бири болуп дуряр. Эмма бу обада интернетде беян эдилиши ялы, овган серхеди билен баглы хич-хили дартгынлылык ягдайлары йүзе чыкмаяр ве оба яшайҗылары парахат дурмушда яшап, хер ким өз гүн-гүзераны билен мешгул. Догры мундан 5-6 йыл озал оба яшайҗыларыныӊ арасындан овган контрабандачылары билен арагатнашык саклап неше серишделерини алан адамлар йүзе чыкарылып сакландылар. Йөне көпден бәри бу обада шейле ягдайлара душ гелиненок. Мунуӊ себәбини юртда неше серишделериниӊ доланшыгына гаршы гечирилйән чәрелериӊ нетиҗеси билен дүшүндирмек болар. Шейле хем соӊкы вагтларда түркмен серхетчилериниӊ серхедиӊ горагыны гүйчлендирмеклери хем бу ягдайларыӊ өӊүни алмага улы тәсирини етирйәр. Оба яшайҗыларыныӊ айтмагына гөрә, хәзирки вагтда серхедиӊ горагы өӊкүлере гараныӊда хас гүйчлендирилен ве серхедиӊ угрундакы гораг десгаларында видео аркалы гөзегчилик эдилйән камералар гурналыпдыр. Шейле-де серхедиӊ горагында ховада учян энҗамларыӊ учурыляндыгы барада гүррүӊлер хем бар. Йөне бу энҗамларыӊ уланыляндыгы барада серхетчилер тарапындан маглуматлар аян эдилмейәр. Соӊкы вагтларда маллары бакмак, ав этмек я-да башга хили максат билен серхет десгаларына 1-2 км. голайлашылан ягдайында хем серхет нарядларыныӊ гысга вагтда саӊа тарап гелйәндигини гөрмек боляр. Бу болса өз гезегинде серхетчилериӊ агзалан энҗамлар аркалы серхеде гөзегчилик эдйәндиклерине шаятлык эдйәр. Түркмен-овган серхеди асуда!