Şygyryýet äleminiň soltany, Magtymguly Pyragynyň söz mülküne talaň salyp, onuň dünýä deňelýän, döredijilik ummanyna hyýalymy ýüzdürip, setirleriň yzynda sermenip ýörşüme „Hindistana hyýal“ eden göwnüm, köňül köşgüne sygman „146 müň agaç ýöly“ külterläp, dünýäni seýran eýledi. „Pikir derýasynda aklym gämisin, batyrmyşam çyka bilmen neýläýin?“ - diýmänmidir şahyryň özem. Dünýäniň ruhy hazynasynyň aýrylmaz bölegine öwrülen bu ummanda gark bolmana razy menem... Şygyrýet älemniň hany-soltany Şygyr atam, şahyr Magtymgulydyr. Hak sözüň ýalkymy, hakyň ýalkany Şygyr atam, şahyr Magtymgulydyr. Hünji deý sözleri giden bir nakyl, Hazynalar genji, tyllaýy akyl, Köňül derýasyna guýulýan akym, Şygyr atam, şahyr Magtymgulydyr. Her sözi merjendir ýene dürdäne, Dürdäne sözleri merjenli däne, Peder nesihatly, ylymly dana, Şygyr atam, şahyr Magtymgulydyr. Dilinde senadyr, sözleriň düri, Her sözünde öwşün atýar hak nury, Beýik söz ussady, sözleriň piri, Şygyr atam, şahyr Magtymgulydyr. Pähim-paýhas ummanynda boýladan, Goşgulary köňül içre seýl eden, Öz ilini şygry bilen beýgelden, Şygyr atam, şahyr Magtymgulydyr. Aýralygyň dagyn çeken Pyragy, Şygyrýetiň bagyn eken Pyragy, Berkarar döwletiň öçmez çyragy Şygyr atam, şahyr Magtymgulydyr. Yşk dagyn gögüň goýnundan asyp, ne beladyr kimse çeker bu derdi?“- diýip, gök titredip, daşlary eredip, haýbatly daglary yşkyň öňünde dyza çökerip, keşt eýleýip, dünýäni yşka saldyň-la Pyragy! Rumy-Kaýsar düzünde, Meňli gyzyň yzynda „saçbagyň ujunyň simden işmesine“, şabram-şelpeleriň owazyn goşup, „ajap, asal-şeker sözler ýesir bolmuş bu zybana!“ Ýörseň, ýarym guwana men, Serwi kamat boýlaryňa, Gülden puşeş ýaraşypdyr. Ajap rahat boýlaryňa. Pyragy adyň düşüp ilden-ile, şygryň geçip dilden-dile, «Okatdylar, hak sözledim sözümi, segsen müň kelamy beýan diýdiler» - diýip, türkmene aýan bolan „80 müň kelamny“, 72 millete beýan eýlediň! „Dünýä bir ýüzük bolsa, Magtymguly onuň göwher gaşydyr“ - diýlip, dünýäň ýüzüniň bezegine deňeldiň! Seniň her bir sözüň köşekli düýä deňeldi. Seniň danalygyň dünýä deňeldi! Şeýdip „Jeýhun bile Bahry - Hazar arasynda küren tutan gözel tükmen ilini“ „belent derejeli millete“ deňediň! Ol merdiň ogludyr mertdir pederi”. Beslenip göwün paslyna, Jöwher pähmiňe seslene, Buýsanyp beýik aslyna, şanyňa toý tutýar halkyň. Akyl söze kalbyn çoýup, Şygyrlaryň jandan söýüp Şahyryna hormat goýup Şanyňa toý tutýar halkyň. Uzaklara nazar aýlap Şygyrýetiň günün toýlap Parasada sežde eýläp, Şanyňa toý tutýar halkyň. Dür sözlerden goşgy dokap, Sarpaňy belentde saklap Arkadaga alkyş okap, Şanyňa toý tutýar halkyň. 290 ýyl mundan owal Türkmeniň mawy asmanynyň astynda parlak ýyldyz bolup döran, “menden soňkulara ýadygar bolsun diýip, köňle gelenini taraşlap şagladan şahyr Magtymguly Pyraga bagyşlap „Magtymguly söz binýadyň, agzynda ýakynyň-ýadyň“ – diýip, Pyragyň söz mülküne, şygyrýet şalygyna seýrana çykyp,... „Pikir derýasynda akyl gämisini batyryp“, paýhasly nazaryny asyrlardan-asyrlara dikip oturan şahyryň, „hüthütniň perin döwede batyryp, efsun urup inderen namasyndan gaýtaryp, onuň hiç wagt garramajak pähim-paýhasyndan, daglar-dünýeler garrasa-da hiç wagt dargamajak akyl-parasadyndan söz açyp... Şahyryň asal sözlerini köňül içre nagş edip, Şahyryň sözi bilen aýdanyňda, “saklana bilmedim, sözler zybana geldi...” PYRAGYNYŇ KÖŇÜL TELWASY HINDI! “Ýer ýagşysy” nama bolup, galama, Alkyş sözler ylham berip kelama, Arkadagly türkmen geldi salama, Pyragynyň köňül telwasy Hindi! Türkmen derwezesi ynha, Delide, Baýram han şahyryň ady dilinde, Abdyrahym han hahanyň ilinde, Pyragynyň köňül telwasy Hindi! Magtymgulyň goşgularny okaşyp, Şirin söhbet, çeper söze utgaşyp, Ýatlama galdyrdy mende üýgeşik, Pyragynyň köňül telwasy Hindi! Kalidasa hem-de Mahatma Gandi, Raj Kapura dünýäň nazary döndi, Kök uran daragtyň gülleýär indi, Pyragynyň köňül telwasy Hindi! Gyzlarynyň ýaňagynda haly bar, Hindistanyň hoşmanzarly ili bar, “On iki müň agaç jaýy” ýoly bar, Pyragynyň köňül telwasy Hindi! Hindi sitarasy-türkmen dutary, Iki halkyň pauzasyz ykrary, Arkadagly halkyň ýürek şygary, Şahyryň duýguly dünýäsi Hindi! Sapaly geljegiň güwäsi Hindi! TÜRKMENISTAN-HINDISTAN Ýöräp bagtyň ýolundan, Aýdym düşmez dilinden, Ösüp barýar gün-günden, Türkmenistan-Hindistan. Hyýalynda Pyraga, Arzuw bolan görmäge, Ylham berýär ýürege, Türkmenistan-Hindistan. Bir elinde dutary, Bir elinde sitary, Iki halkyň kalp tary, Türkmenistan-Hindistan. Baýram han şygyr okan, Indira Gandili mekan, Iki döwlet –bir mukam, Türkmenistan-Hindistan. Jawaharlar Neruly, Rabindranat Tagorly, Arkadag Howandarly Türkmenistan-Hindistan. Berkararlyk gadamly, Ýoly aýdan aýdyňly, Bagtyýarlyk aýdymly, Türkmenistan-Hindistan.