Şeýle bir oýlanyp görüň, her gün irden siziň hasabyňyza yzyna gaýtaryp bermesizden 86400 manat geçirilýän bolsun. Emma ýekeje şert bilen. Ol hem siziň hasabyňyza geçirilen puluň ulanylman galan möçberi şol günüň ahyrynda hasabyňyzdan öçürilýär. Eger şeýle bolsa, siz näderdiňiz?! Elbetde şol puly iň soňky teňňesine çenli sowardyňyz. Hatda geçirilen pul 86400-den köpräk bolsady diýerdiňiz. Aslynda oýlanyp görsek, biziň her birimiziň hasabymyzda her gün şeýle pulumyz bar. Dünýädäki her bir adama her gün 86400 sekunt wagt berilýär. Wagt bolsa bu dünýädäki iň gymmatly baýlykdyr. Wagt bilen pul gazanmak bolar, emma pul bilen wagty asla.Wagtyň gadyr-gymmatyny duýmaklyk, ony tygşytly we netijeli peýdalanyp bilmeklik biziň özümize baglydyr. Emma wagt hiç haçan durmaýar. Ol suw ýaly akyp gidip otyr. Ynsanogly wagtyň gymmatyny ony bisarpa tutanyndan soňra bilip galýar. Eger-de: Bir ýylyň gadryny bileýin diýseňiz, gutardyş synagyndan geçip bilmedik talypdan soraň. Bir aýyň gadryny bileýin diýseňiz, wagtyndan öň doglan çaganyň ejesinden soraň. Bir hepdäniň gadryny bileýin diýseňiz, hepdelik gazetiň redaktoryndan soraň. Bir günüň gadryny bileýin diýseňiz, resminamalaryny tabşyrmak üçin bir gün gijä galan dalaşgärden soraň. Bir sagadyň gadryny bileýin diýseňiz, duşuşyk wagtyna sabyrsyzlyk bilen garaşýan aşyklardan soraň. Bir minudyň gadryny bileýin diýseňiz, bir minut gijä galyp otludan, uçardan ýa-da awtobusdan galandan soraň. Bir sekundyň gadryny bileýin diýseňiz, birdenkä ulagy sowup, ýol-ulag hadysasynyň öňüni alan sürüjiden soraň. Bir millisekundyň gadryny bileýin diýseňiz, dünýä olimpiadasynda bir millisekuntlyk tapawut bilen altyn medala ýetip bilmän, kümüş medal alandan soraň.