Bruklinde bir garry adam nähoşlap, ýoldan beýleki tarapa geçeninde büdräp ýykylypdy. Garry adamy derrew „Tiz kömek“ bilen hassahana ýerleşdirdiler. Ol adam hassahanada beýhuş bolup ýatyrka oglunyň adyny agzap, samrap başlaýar. Hassahanadaky nobatçylar garry hassanyň jübüsinden tapylan bir hat esasynda ol adamyň oglunyň deňizçidigini we Demirgazyk Karolinada esgerlik gullugyndadygyny bilýärler. Ýagdaý Bruklin „Gyzyl haç“ merkezine bildirilýär. Olar hem habary Demirgazyk Karolina „Gyzyl haç“ merkezine ýetirýärler. Hassanyň ýagdaýy agyr bolandygy üçin habaryň haýal etmän harby bölüme ýetirilmegi hökmandy. „Gyzyl haçda“ işleýän işgärleriň biri bilen serkerde maşyna münüp, ýigidi gözlemäge gidýärler we ony türgenleşikde gezip ýörkä palçygyň içinden tapýarlar. Wagt ýitirmän maşyna münüp howa menziline alyp gidýärler. Ýaş ýigit hassahananyň gapysyndan ätläninde iňrik gowy garalypdy. Tolgunmaklygy ýadawlygyndan hem üstün çykýardy. Şepagat uýasy ony hassanyň ýanyna eltýär we ol adama: – Ynha, ogluňyz geldi – diýýär. Şepagat uýasy hassa gözlerini açýança bu sözleri birnäçe gezek gaýtalamaly bolýar. Dermanlar bilen ukuly ýagdaýa gelen hassa gabadyndaky esger eşikli ýigidi gözi ümezläp duransoň, zordan görýär. Garry elini näme üçindir ýigide tarap uzadýar. Esger kuwwatly barmaklary bilen garrynyň titreýän ellerini kuwwat bermek isleýän ýaly mähir bilen gysýar. Soňra hassa seredýäniň getiren oturgyjyny krowatyň ýanyna çekýär. Hassahanada gijeler wagty bilen geçmeýärdi; onsoň hem deňizçi entek hem ýarym garaňky otagda otyrdy, ellerini aýasynda saklap duran hassasyna biraz umyt, biraz kuwwat bermäge synanyşýardy. Hobatçy lukman haçan otaga girse, ýigidi şol bir ýagdaýda görýärdi. Ol birnäçe gezek ýaş ýigidiň biraz daşary çykyp dynç almagyny haýyş edipdi, emma oňa sözüni diňledip bilmändi. Ýaş esger garrydan gözüni aýyrmaýardy. Ne giren şepagat uýasyna seredýärdi, nede hassahananyň içinden gelýän gohlara gulak salýardy. Hassa bütin gijäni esgeriň ellerini gujaklap ýatdy we gün doganynda jan berdi. Şol wagt ýaş ýigit garrynyň elini krowatda goýdy we gidip hassa seredijini çagyrdy. Soňra hem garaşylýan otaga geçdi. Nobatçy lukman gerek bolan işleri ýerine ýetireninden soňra esgeriň ýanyna gelip, hassa başsaglygyny dilemek isläninde, ýaş ýigit onuň sözüni kesdi hem-de: – Bu adam kimdi – diýip sorady. Nobatçy lukman haýran galmak bilen: – Ol siziň kakaňyz dälmidi näme – diýip sorady. Ýaş ýigit: – Ýok. Men-ä ony ömrümde ilkinji gezek görýärin– diýdi. – Sizi onuň ýanyna äkidenimde näme üçin bu barada maňa hiç zat aýtmadyňyz? - Palata giren badyma bu işde bir ýalňyşlygyň bolandygyny duýdum. Emma garry ogluna sabyrsyzlyk bilen garaşýardy ahyry. Ölmezinden öň ogluny iň soňky gezek görmek isleýändigi bellidi. Görgüli adam şeýle bir gynançly ýagdaýdady welin, öz ogly däldigimi aňşyryp biljek däldi. Şeýle ýagdaýda ol adamyň oglunyň ýerine bolup bilerin we iň soňky sagatlaryny arkaýynlykda geçirmegine kömek edip bilerin diýip pikir etdim we hiç bir zat aýtman onuň ýanynda boldum. Ýaş deňizçi sözüni tamamlanyndan soňra yzyna dolanyp gitdi. Iki günden soňra ol adamyň hakyky ogly kakasynyň jynazasyny okatdyrmak üçin esgerlik gullugyndan gaýdyp gelýär. Ýalňyşlygyň sebäbi örän ýönekeýdi. Şol bir goşunda gulluk edýän iki esgeriň atlarynyň meňzeşligi kadrlar bölümini ýalňyşdyrypdy. Soň bu ýalňyşlyk bilinipdi we garrynyň ogluny ýola salypdyrlar. Emma bu ýalňyşlyk dünýäde nähili gowy ýürekli adamlaryň bardygyny ýene bir gezek görkezmeýärmi näme!?