Men seniň aşygyň, gara gözli ýar, Daşa gitme, daşa gitme ýanymdan. Görküňe ömürlik boldum hyrydar, Hyrydar men, baha kesýän janymdan. Men seniň aşygyň, eý, açyk asman, Goý, mydam päk bolsun ýüzleriň seniň. Men seniň aşygyň, eý, beýik ynsan, Goý, mydama gülsün gözleriň seniň. Men seniň aşygyň, eý, gözel görnüş, Sähralar, tokaýlar, derýalar, daglar… Men seniň aşygyň, eý, bagtly durmuş, Ajaýyp döwranlar, sapaly çaglar… Eý, mukaddes ömür – eý, eziz myhman! Eý, bilbil, eý, bahar, eý, şanly ýaşlyk, Eý, şöhratly göreş – belent merduwan, Men size bendiwan, Men size aşyk. Ýok, hiç haçan diýmerin men “ýadadym”, Namart bolsun, kim gözlese bahana. Tä ölinçäm söýmek meniň adatym, Başdan söýmek üçin indim jahana. Halyl Kulyýew