Dünýäniň iri surat agentlikleriniň biri bolan Getty Images ABŞ-da karz berijilerden gorag almak üçin kazyýete ýüz tutdy. Dünýäniň dürli künjeklerinde köpçülikleýin habar beriş serişdeleri, kompaniýalar we awtorlar tarapyndan suratlary, wideolary hem-de illýustrasiýalary ulanylýan kompaniýa bu ädim arkaly işini togtatmazdan, maliýe ýagdaýyny üýtgedip gurmagy meýilleşdirýär. Munuň üçin ABŞ-nyň kanunçylygynda göz öňünde tutulan Chapter 11 atly düzgün ulanylar. Kompaniýa bu işi 2026-njy ýylyň ahyryna çenli tamamlamaga we 533 million dollara çenli täze maýa goýumlaryny çekmäge umyt edýär. Üýtgedip gurmak tamamlanandan soň, kompaniýanyň ähli paýnamalary Getty Images bilen bagly düzümlere we Koch Equity Development kompaniýasyna geçiriler. Soňky kompaniýa hem bu işe maliýe goldawyny bermek üçin 143 million dollara çenli serişde bölüp berer. Getty Images eýýäm üýtgedip gurmak meýilnamasyny tassyklatmak üçin Delawer ştatynyň bankrotlyk işleri boýunça kazyýetine ýüz tutdy. Kazyýete tabşyrylan resminamalarda kompaniýa öz aktiwleriniň we borçnamalarynyň möçberini 1 milliarddan 10 milliard dollara çenli aralykda görkezipdir. Getty Images kompaniýasy adaty iş tertibinde işlemegini dowam etdirjekdigini mälim etdi. Kompaniýanyň aýtmagyna görä, bu amal suratçylaryň we beýleki awtorlaryň, mazmun üpjün edijileriň, hyzmatdaşlaryň, müşderileriň hem-de işgärleriň işine täsir etmez. Kompaniýanyň maliýe kynçylyklary onuň esasy bäsdeşi Shutterstock bilen meýilleşdirilen birleşmesiniň amala aşmazlygyndan soň has-da ýitileşdi. Mundan başga-da, uly möçberdäki bergiler we emeli aň tehnologiýalarynyň ösmegi kompaniýa goşmaça basyş döredýär. Häzirki wagtda emeli aň adaty surat banklarynyň hyzmatlaryndan peýdalanmazdan hem şekilleri döretmäge mümkinçilik berýär. Chapter 11 nämäni aňladýar? Chapter 11 — ABŞ-nyň kanunçylygynda kompaniýalara bergilerini gaýtadan gözden geçirmäge we kazyýetiň gözegçiligi astynda karz berijiler bilen maliýe ýagdaýyny gowulandyrmak barada ylalaşmaga mümkinçilik berýän düzgün. Adaty ýatyryş işlerinden tapawutlylykda, bu ýagdaýda kompaniýa üýtgedip gurmak meýilnamasy taýýarlanyp, tassyklanýança işini dowam etdirip bilýär. Şonuň üçin Getty Images kompaniýasynyň bu düzgüne ýüz tutmagy surat agentliginiň derrew ýapyljakdygyny aňlatmaýar.