21-nji oktýabrda Aşgabat şäherindäki Beýik Saparmyrat Türkmenbaşy adyndaky Türkmenistanyň Şekillendiriş sungaty muzeýinde Gazagystan Respublikasynyň güni mynasybetli «Ғасырлар ізімен: Қазақстан тарихының бейнесі» («Asyrlaryň yzlary: Gazagystanyň taryhy keşbi») atly fotoserginiň dabaraly açylyşy boldy. Gazagystanyň Aşgabatdaky ilçihanasynyň sosial ulgamlardaky sahypalarynda habar berlişi ýaly, sergide Gazagystanyň Milli merkezi muzeýiniň gaznasyndan alnan XIX asyryň ahyryna we XX asyryň başlaryna degişli seýrek arhiw suratlarynyň 30-sy görkezilýär. Türkmenistanda durmuşa geçirilýän bu medeni taslama iki ýurduň liderleriniň arasynda gazanylan ylalaşyklaryň çäklerinde amala aşyryldy. Taslama iki halkyň arasyndaky doganlyk gatnaşyklaryny we ruhy ýakynlygy pugtalandyrmaga gönükdirilendir. Fotosergi 25-nji oktýabra çenli dowam eder.