Türkmenistanyň wekiliýeti 9-10-njy oktýabrda Bişkekde geçirilýän ÝHHG-niň Merkezi Aziýa üçin media konferensiýasyna gatnaşýar. Wekiliýetiň düzüminden türkmen köpçülikleýin habar beriş serişdeleriniň (KHBS) wekilleri, şeýle hem Türkmenistanyň Daşary işler ministrliginiň işgärleri, ÝHHG-niň Aşgabatdaky edarasynyň media tälimçileri we şol edaranyň wekili orun aldy. Konferensiýa «Novotel Bishkek City Centre» myhmanhanasynda «Umumy hakykaty gurmak: sanly eýýamda maglumat bütewiligi, media etikasy we ynam» şygary astynda geçirilýär. Çäräni guramanyň Media azatlygy meseleleri boýunça wekili guraýar. Forum Merkezi Aziýa ýurtlaryndan we Mongoliýadan KHBS-niň, döwlet edaralarynyň, raýat jemgyýetiniň we hünärmenler bileleşiginiň wekillerini bir ýere jemledi. Birinji günde konferensiýanyň açylyşyndan soň, gatnaşyjylar media etikasyny we KHBS-de öz-özüňi düzgünleşdirmegi, sanly platformalaryň we emeli aňyň eýýamynda media azatlygyny goramak çemeleşmelerini, şeýle hem sebitde maglumat bütewiliginiň hukuk çäklerini ara alyp maslahatlaşýarlar. Mundan başga-da, žurnalistleriň sanly howpsuzlygy boýunça amaly maslahat meýilleşdirildi. Çäräniň ikinji gününde maksatnama gender deňligini göz öňünde tutmak bilen žurnalistleriň howpsuzlygy meselelerini, žurnalistika bilimini we hünär standartlaryny, şeýle hem KHBS-de emeli aňy ulanmak boýunça redaksiýa syýasatyny işläp düzmegi öz içine alýar. Konferensiýa 10-njy oktýabrda tamamlanar.