Gyrgyzystanyň Prezidenti Sadyr Žaparow işewürleriň we sarp edijileriň sebitleýin önümlere elýeterliligini giňeltmek üçin Merkezi Aziýa ýurtlary we Azerbaýjan üçin bitewi elektron söwda meýdançasyny döretmegi teklip etdi. Ol bu başlangyjy «Awaza» milli syýahatçylyk zolagynda geçirilýän Sebitiň döwlet Baştutanlarynyň sekizinji Konsultatiw duşuşygynda öňe sürdi. Prezident S.Žaparow onlaýn-söwdanyň ösüşiniň logistika infrastrukturasynyň: eltip bermegiň, ammarlaşdyrmagyň, gümrük resmileşdirilmeginiň we ýükleri yzarlamagyň döredilmegi bilen bilelikde gitmelidigini nygtady. Taslamany amala aşyrmak üçin Bişkek Ýokary tehnologiýalar parkynyň hünärmenlerini çekmäge taýýardyryny bildirdi. Mundan başga-da, Prezident ýurtlaryň hökümetlerine oba hojalyk önümlerini gaýtadan işlemekde, ýeňil senagatda, gurluşyk serişdeleriniň önümçiliginde we logistikada anyk bilelikdäki taslamalary kesgitlemegi teklip etdi. Onuň sözlerine görä, her bir taslama üçin gatnaşyjylary, maliýeleşdiriş çeşmelerini we amala aşyrylyş möhletlerini görkezmek gerek. S.Žaparow ulag ulgamy barada hem aýdyp, ykdysady hyzmatdaşlygyň netijeliliginiň ugurlaryň ygtybarlylygyna, daşama töleglerine we üstaşyr geçirişiň çaklama durnuklylygyna baglydygyny nygtady. Ol sebitiň ýurtlaryna halkara ulag we önümçilik zynjyrlyklaryna gatnaşmaga goşmaça mümkinçilikler açjak «Hytaý — Gyrgyzystan — Özbegistan» demir ýolunyň gurluşygyny aýratyn belläp geçdi. «Biziň ugur alýan zadymyz kesgitlenen netijeler bolmalydyr: eltip bermegiň tölegini peseltmek we ýoldaky wagty gysgaltmak. Şunlukda, her bir ýurduň sebitleýin ulag taslamalaryna doly hukukly gatnaşmaga mümkinçiligi bolmalydyr» diýip, Prezident aýtdy. S.Žaparow ekologiýa we ynsanperwerlik temalaryna hem degip geçdi. Ol sebitiň uzakmöhletleýin ösüşiniň bagly bolan buzluklaryny we dag ekoulgamlaryny gorap saklap galmagyň zerurlygyny görkezdi. Halklary ýakynlaşdyrmak üçin ol taryhy şäherleriň, dag we Hazarýakasy ugurlarynyň ilerledilmegini birleşdirip, «bir syýahat — birnäçe ýurt» ýörelgesi boýunça umumy syýahatçylyk giňişligini emele getirmegi teklip etdi. Çykyşynyň soňunda Prezident Gyrgyzystanyň sebitde hoşniýetli goňşuçylyga we özara bähbitli hyzmatdaşlyga mundan beýläk hem ýardam etmäge taýýardygyna ynandyrdy.