Belarusuň Polosk şäheri 12-13-nji oktýabr aralygynda ilkinji gezek halkara görnüşdäki maşgala forumyny kabul eder. Halkara habarlar merkeziniň habar berşi ýaly, daşary ýurtly hyzmatdaşlara bu çakylygy Belarusuň Milli Ýygnagynyň Respublikanyň Geňeşiniň bilim, ylym, medeniýet we durmuş ösüşi boýunça hemişelik komissiýasynyň başlygy Natalýa Pawlýuçenko «Awaza» milli syýahatçylyk zolagynda geçen zenanlar forumynda eden maksatnamalaýyn çykyşynda mälim etdi. Belarusuň wekili gender deňliginiň, eneligi we çagalygy goldamagyň Respublikanyň döwlet syýasatynyň üýtgemeýän ileri tutulýan ugurlary bolmagynda galýandygyny belledi. Onuň sözlerine görä, ýurtda zenanlara durmuşynyň iň möhüm pursatlary boýunça çäreler ulgamy döredildi. «Biziň ýurdumyzyň Prezidenti hemişe zenanlary goldady we goldap gelýär» diýip, Pawlýuçenko belledi. Ol Aleksandr Lukaşenkonyň karary bilen Belarusda 2026-njy ýylyň «Belarus zenany ýyly» diýlip yglan edilendigini ýatlatdy. Zenanlar ilatyň 54 göterimini düzýär, zähmete ukyply ýaşdaky zenanlaryň iş bilen üpjünçiligi bolsa 85,5 göterimden geçýär. Hökümetiň gözegçiliginde Gender syýasaty boýunça milli geňeş işleýär, zähmet hakynyň deňligi üpjün edilýär hem-de işi we çagalary terbiýelemegi utgaşdyrmak üçin şertler döredilýär. Belarusuň wekiliniň maglumatlaryna görä, ýolbaşçy wezipelerde zenanlaryň wekilleri hem artýar: olar Milli Ýygnakda ýerleriň takmynan 33 göterimini, ýokary derejeli döwlet dolandyryş edaralarynda 36 göterimini, ýerli öz-özüni dolandyryş edaralarynda 48 göterimini we kazyýetlerde 67 göterimini eýeleýärler. Zenan telekeçiliginiň paýy takmynan 42 göterime ýetdi. Pawlýuçenko maşgala institutyny goramagyň Konstitusiýa derejesinde berkidendigini we iň möhüm döwlet wezipelerine degişlidigini aýratyn belledi.