Türkmenistanyň türgenleri Gresiýanyň Saloniki şäherinde tamamlanan sambo boýunça ýaşlaryň arasyndaky dünýä çempionatynda ýedi medal gazandylar. Ýaryşlar 2–4-nji oktýabrda «PAOK Sports Arena» sport toplumynda geçirildi. Birinji gün oglanlaryň arasynda 64 kilograma çenli agram derejesinde Annamuhammet Annamuhammedow bürünç medal gazandy. Ikinji gün türkmen türgenleri ýetginjekleriň arasynda söweş sambosy boýunça üstünlikli çykyş etdiler. Altyn medallara Alyhan Aýdogdyýew (58 kilograma çenli), Yslam Hemraýew (71 kilograma çenli) we Mälikberdi Begiýew (98 kilogramdan ýokary) mynasyp boldular. Resul Jebraýylow (64 kilograma çenli) we Welmyrat Nepesow (88 kilograma çenli) kümüş medal gazandylar. 79 kilograma çenli agram derejesinde bolsa Döwrangeldi Kakabaýew bürünç medala mynasyp boldy.