15–17-nji sentýabr aralygynda Gazagystanyň Almaty şäherinde Aziýa we Ýuwaş ummany üçin BMG-niň Ykdysady we durmuş komissiýasynyň (ESKATO) sebitleýin bölümçesi tarapyndan guralan Demirgazyk we Merkezi Aziýanyň Durnukly ösüş maksatlaryny durmuşa geçirmek boýunça 10-njy köptaraplaýyn forumy geçirilýär. Çärä Türkmenistanyň Maliýe we ykdysadyýet ministrliginiň Strategik we durnukly ösüş müdirliginiň baş hünärmenleri Elita Şumskaýa we Laçyn Weliýewa gatnaşýarlar. Forumyň Demirgazyk we Merkezi Aziýa ýurtlarynyň meýletin milli synlaryny (MMS) taýýarlamak boýunça tejribesine bagyşlanan ilkinji mejlisiniň dowamynda Laçyn Weliýewa Türkmenistanyň 2027-nji ýylda Nýu-Ýorkda hödürlejek üçünji Meýletin milli synynyň taýýarlyk işi barada çykyş etdi. Forumyň «Gury ýer ekoulgamlaryny gorap saklamak» atly 15-nji Durnukly ösüş maksadynyň durmuşa geçirilişine bagyşlanan ara alyp maslahatlaşmalarynyň çäklerinde Elita Şumskaýa Türkmenistanyň bu maksady amala aşyrmakdaky tejribesini tanyşdyrdy. Tanyşdyryşda ýurdyň tokaýlary dikeltmek, çölleşmä garşy göreşmek we biologik dürlüligi gorap saklamak ugurlarynda gazananlary beýan edildi.