Ozal habar berşimiz ýaly, 9-njy sentýabrda Türkmenistanda pagta ýygymyna girişildi. Ahal welaýatynda gowaça ýetişdirilen 135 müň gektar meýdanyndan «ak altynyň» 280 müň tonna hasylyny almak göz öňünde tutulýar. «Ahalpagta» önümçilik birleşiginiň garamagyndaky pagta arassalaýjy kärhanalaryň 8-si, kabul ediş harmanhanalarynyň 19-sy doly taýýarlyk hatarynda goýuldy. Awtoulaglaryň 1 müň 100-e golaýy hasyly daşamaga gatnaşar. «Ahalobahyzmat» önümçilik birleşiginiň garamagyndaky kuwwatly pagta ýygyjy kombaýnlaryň 217-si möwsümiň dowamynda pagtaçylaryň ygtyýarynda bolar. Balkan topragynda pagta ýygyjy kombaýnlaryň 18-si, ýygnalan hasyly daşamak üçin awtoulaglaryň 90-dan gowragy bökdençsiz işlediler. Welaýatda 13 müň gektarda ýetişdirilen gowaçadan 16 müň tonna «ak altyn» hasylyny almak göz öňünde tutulýar. Daşoguz welaýaty boýunça 140 müň gektar meýdanda pagtanyň bol hasyly ýetişdirildi. Ýere gaçan ýyldyzlary ýatladýan pagtaly atyzlar 275 müň tonnalyk sepgide hökman ýetiljekdigine uly ynam döredýär. Bu işde pagta ýygyjy kombaýnlaryň 200-den gowragynyň güýjünden peýdalanylýar. Munuň üçin 50 müň gektar meýdanda gowaçalaryň ýapragyny düşürmek işleri geçirildi. Ýerli pagta arassalaýjy kärhanalaryň 10-synda, harmanhanalaryň 47-sinde ýygnalan hasyl gije-gündizleýin tertipde bökdençsiz kabul ediler. Şu ýyl Lebap topragynda 130 müň gektar meýdandan 320 müň tonna pagta hasylyny ýygnamak meýilleşdirilýär. Möwsümiň depginli alnyp barylmagy üçin «John Deere» kysymly pagta ýygyjy kombaýnlaryň 218-si işe çekiler. Ýygnalan hasyl welaýatdaky pagta arassalaýjy kärhanalaryň 11-sinde hem-de harmanhanalaryň 38-sinde kabul ediler. «Marypagta» önümçilik birleşiginiň 9 sany pagta arassalaýjy kärhanasy hem-de kabul ediş harmanhanalarynyň 35-si şu ýyl welaýat boýunça ýetişdirilen pagta hasylyny bökdençsiz kabul eder hem-de ony gaýtadan işlär. Welaýatyň pagtaçy daýhanlary 162 müň gektar meýdana gowaçanyň ýerli toprak hem howa şertlerinde ýokary hasyl berýän, kesellere durnukly orta süýümli «Ýolöten — 7», «Ýolöten — 39», inçe süýümli «Ýolöten — 14» sortlaryny ekip, bol hasyl ýetişdirdiler. Olar 359 müň tonna «ak altyn» hasylyny döwlet harmanyna tabşyrmagy maksat edinýärler. Munuň üçin pagta ýygyjy kombaýnlaryň 224-si bökdençsiz işlediler. Bu barada «Türkmenistan» gazetinde habar berildi.